Радыё «Свабода»: Міліцыя тэлефануе тым, хто выязджаў ва Украіну перад матчам у Львове
«Што вы рабілі ў Львове? На футбол з апазіцыянерамі ездзілі?» — такімі пытаннямі міліцыя пачынае правяраць людзей, што выязджалі ва Украіну напярэдадні футбольнага матча паміж зборнымі Украіны і Беларусі, што прайшоў 5 верасня.
Гэта апавяла Аксана Карпавец, яна прыехала ў Львоў тым самым цягніком, што й фанаты — 5 верасня. Яна ездзіла ў Львоў на Кангрэс культуры Усходняга партнёрства.
Сёння ёй патэлефанавалі з Жыткавіцкага РАУС, па месцы яе рэгістрацыі, і спыталі, ці не ездзіла яна на футбольны матч і ці не бачыла чагосьці падазронага. На пытанне, чаму міліцыя гэтым цікавіцца, ёй адказалі, што на матч ездзіла шмат апазіцыянераў. А таму цяпер усіх, хто ездзіў у Львоў, правяраюць.
«Міліцыянт удакладняў, калі я перасякла мяжу, што за кангрэс, на які я ездзіла. І калі я расказала, што на матчы не была і не ведаю, ці былі там апазіцыянеры, ён выбачыўся і скончыў размову», — расказала Карпавец.
На футбольны матч у Львове 5 верасня прыехала больш за тысячу фанатаў з Беларусі. Напярэдадні яны правялі сумесную акцыю па здачы крыві, прайшлі разам маршам да стадыёна, а ўжо падчас гульні мелі аднолькавыя крычалкі.
У той час як Парашэнка падзякаваў беларускім фанатам за падтрымку незалежнасці і цэласнасці Украіны, Генадзь Давыдзька, кіраўнік Белтэлерадыёкампаніі, назваў іх юнымі нацыстамі. Гэта выклікала рэзкую крытыку з боку заўзятараў.
Каментары