Мікалай Статкевіч пракаментаваў БелаПАН заклік Аляксандра Лукашэнкі да апазіцыі «жыць па законе».
Каментуючы 11 кастрычніка апазіцыйныя акцыі, якія праводзіліся ў Мінску апошні месяц, Лукашэнка параіў апазіцыі «жыць па законе». «Выбары заканчваюцца ў 20.00, пачынайце жыць па законе», - заявіў ён. Паводле слоў Лукашэнкі, падчас выбарчай кампаніі апазіцыя парушала беларускае заканадаўства, арганізуючы несанкцыянаваныя пікеты і шэсці. Пры гэтым ён дадаў, што ведае ўсіх прадстаўнікоў апазіцыі. Паводле слоў Лукашэнкі, іх «400 чалавек з дзесяці мільёнаў», а таксама разявакі, якія прыходзяць паглядзець на акцыі. «Раю выконваць закон. Не таму, што мы баімся за гэтых 400 чалавек. Мы турбуемся за тых разявак, якія збіраюцца», - сказаў Лукашэнка.
Статкевіч, у сваю чаргу, заявіў: «Лукашэнка заклікае ўсіх жыць па законе і сам пачне жыць па законе? На ім вісіць абвінавачванне па асабліва цяжкіх артыкулах Крымінальнага кодэкса пачынаючы з 1996 года».
«Калі ён сабраўся жыць па законе, гэта добра, але ці не пазнавата? Хоць мы даруем, калі ён верне краіну ў законнае рэчышча, — сказаў палітык. — Гэта шоу, якое ён зладзіў, гэта што — законна? Выкраданне і забойства апанентаў — законна? Змена Канстытуцыі, роспуск парламента, падаўжэнне паўнамоцтваў без выбараў на 2,5 года на падставе канстытуцыйнага рэферэндуму — гэта законна? Пералік можна бясконца працягваць».
У той жа час Статкевіч спадзяецца, што, «можа, чалавек зразумеў, у якой ён сітуацыі, і, каб паменшыць сваю віну перад беларускім народам, пачне жыць па законе». «Спадзяюся, але мала веру», - адзначыў ён.
Статкевіч дадаў, што ў канцы лістапада плануецца правядзенне вулічнай акцыі, прымеркаванай да рэферэндуму 1996 года.
Цяпер чытаюць
Спевака з «Марафону адзінства» асудзілі за палітыку — прыгадалі каментары 2020-га. Бараніць у суд яго хадзілі сёстры Груздзевы16
Каментары