Набліжаецца да завяршэння будаўніцтва ваеннага гарадка вайсковай часці 7434 унутраных войскаў МУС Беларусі, якая будзе ахоўваць Беларускую АЭС, паведамляе газета «На страже». Восенню гэтага года «вайскоўцы прыедуць у часць, абсталяваную перадавым узбраеннем і тэхнікай», з інфраструктурай мястэчка не змогуць канкурыраваць нават сталічныя брыгады УВ — в/ч 3214 і 5448.
Аб стварэнні матэрыяльна-тэхнічнай базы батальёна паведаміў яго камандзір падпалкоўнік Віктар Жадобін (сын былога міністра абароны Юрыя Жадобіна).
«Фармуецца асобны ўзвод спецыяльнага прызначэння. Група будзе кругласутачна дзяжурыць на кантрольна-прапускным пункце з размешчанай непадалёк бронетэхнікай, каб у любую хвіліну адбіць напад, напрыклад, дыверсантаў або тэрарыстаў», — піша газета.
Паведамляецца, што бяспека АЭС уключае некалькі узроўняў абароны. На адным з іх вайскоўцы в/ч 7434 з дапамогай тэхнічных сродкаў і біяметрычнага абсталявання будуць ідэнтыфікаваць супрацоўнікаў станцыі, «як мяркуецца, па сятчатцы вока і адбітках пальцаў, масе цела і камплекцыі, а таксама правяраць дакументы, спыняць пранос забароненых прадметаў».
У 16 вальерах хутка паселяцца ахоўныя і вышуковыя сабакі. У кіналагічным гарадку ёсць памяшканні для падрыхтоўкі спецыялістаў-кінолагаў, аб'екты для абслугоўвання і дрэсіроўкі чатырохногіх байцоў. Іх прывязуць з кіналагічнага цэнтра ўнутраных войскаў у Магілёве.
З-за асаблівасцяў выканання задач па ахове АЭС штатныя воінскія званні ўведзеных пасад у батальёне будуць на прыступку вышэй у параўнанні з аналагічнымі пасадамі ў іншых часцях. Па больш высокім разрадзе будзе разлічвацца і грашовае забеспячэнне ваеннаслужачых.
Нагадаем, цалкам фармаванне часці павінна завяршыцца ў верасні 2017 года.
Каментары