Беларускія школьнікі заваявалі чатыры медалі на міжнароднай алімпіядзе па хіміі
Ад 6 па 15 ліпеня ў Тайландзе праходзіла 49-я Міжнародная хімічная алімпіяда. Беларускія школьнікі прывезлі адтуль чатыры медалі — тры «срэбры» і адну «бронзу», паведамляе tut.by.
Сёлета за ўзнагароды змагаліся 297 удзельнікаў з 76 краін свету. Яны разыгралі паміж сабой 36 залатых, 65 сярэбраных і 95 бронзавых медалёў.
Бронзавы медаль беларускай камандзе прынёс выпускнік Ліцэя БДУ Раман Мазур. Сярэбраныя медалі заваявалі Аляксей Харлап (гімназія № 2 Бабруйска) і Аляксей Гарахоўскі (гімназія № 29 Мінска). Найлепшы вынік у камандзе паказала дзесяцікласніца Паліна Булаўская (Ліцэй БДУ), якая таксама трапіла ў лік срэбных прызёраў.
На спаборніцтве школьнікі выконвалі заданні практычнага і тэарэтычнага тураў.
Напрыклад, удзельнікам трэба было вымераць кіслотнасць вады з дапамогай кіслотна-асноўных індыкатараў і спектрафотаметрычных вымярэнняў ці вызначыць канцэнтрацыю раствору іядату калія.
Каментары