80-гадовы мовазнаўца Пётра Садоўскі ў судзе: «На фота не я, у мяне нават курткі такой няма». Усе смяюцца
Вядомага мовазнаўцу, экс-пасла Беларусі ў Нямеччыне Пётру Садоўскага (яму 80 гадоў) судзяць сёння за ўдзел у акцыях супраць паглыбленай інтэграцыі. Працэс праходзіць у судзе Цэнтральнага раёна Мінска, паведамляе spring96.org
Спачатку яго вінавацяць па частцы 1 арт. 23.34 КаАП (удзел у акцыі 8 снежня), справу разглядае суддзя Іван Касцян.
Супраць Пятра Садоўскага сведчаць міліцыянеры Андрэй Штоп і Раман Герасімовіч. Суддзя Іван Касцян абвясціў перапынак да 16 гадзінаў.
Наступны працэс разглядае Юлія Густыр. Гэтым разам Пётру Садоўскага абвінавачваюць у парушэнні правілаў удзелу ў масавым мерапрыемстве, што адбылося 7 снежня.
Сведкі-міліцыянты на працэс не з'явіліся, дый прычынаў не патлумачылі. Сп. Пётра прапанаваў суду перадаць свае паказанні ў пісьмовым выглядзе, бо мяркуе, што сакратар суда будзе весці запісы недакладна. Таксама мужчына прапанаваў весці працэс на беларускай мове, суддзя пагадзілася.
Пётра Садоўскі таксама папрасіў суд адправіць пратакол аб адміністрацыйным правапарушэннні ў РУУС, бо ў ім ёсць прыкметы ілжэсведчання міліцыянераў. Ён кажа, што 7 снежня ў 12 гадзінаў не быў на плошчы, а знаходзіўся дома з тэмпературай. На плошчу прыехаў толькі каля 15 гадзінаў, пабыў там 30-40 хвілін і вярнуўся дадому.
А ў пратаколе, які зачытваецца, напісана, што быў у 12 гадзін на плошчы, трымаў бела-чырвона-белы сцяг. Дэманструецца фота з відэакамеры, дзе нібыта зафіксаваны Пётр Садоўскі. Аднак мовазнаўца сцвярджае, што на здымку — не ён, і нават курткі такой у яго няма. Прысутныя ў зале суда смяюцца.
Суддзя абвясціла перапынак, разгляд працягнецца 9 студзеня ў 12 гадзінаў.
Каментары