Ліст Бабарыкі: Трапіць у будучыя падручнікі гісторыі — гэта дарагога варта
Дачка Віктара Бабарыкі ў стрыме на ютубе выказала сваё меркаванне аб абвінавачваннях, падзяку ўсім, хто падтрымлівае палітычных зняволеных і расказала сямейныя гісторыі. Таксама яна зачытала лісты Віктара Бабарыкі.
Марыя Бабарыка падзякавала тым, хто падтрымаў яе пасля першага стрыма.
Яна выказала словы падтрымкі тым сем'ям і іх блізкім, для якіх цяпер вельмі няпросты час.
«Гэта сем'і маіх хроснай мамы і хроснага таты, сем'і татавых сяброў дзяцінства і блізкага памочніка, сем'і кіраўніцтва і супрацоўнікаў банка, сем'і Ціханоўскіх, Севярынца і Статкевіча, сем'і незалежных блогераў і журналістаў, сем'і сябраў ініцыятыўных груп і палітычных актывістаў — усіх людзей, свабода якіх працягвае абмяжоўвацца з парушэннем базавых правоў чалавека», — сказала дачка палітвязня.
Марыя Бабарыка лічыць, што тое, што цяпер адбываецца — гэта паказчык, наколькі слабая пазіцыя сістэмы і наколькі ўладам страшна.
Марыя Бабарыка зачытала вытрымкі з лістоў бацькі.
«Усіх супакойце. Нічога страшнага не адбылося і не адбываецца. Усе жывыя і, я спадзяюся, здаровыя. Чытайце Сіманава: «Ничто нас в жизни не может вышибить из седла!»
А з іншага ліста:
«Прывітанне ўсім! Выдатна, што пачалі атрымоўваць мае лісты. Цяпер прарвецца — і стоміцеся чытаць. Я думаю, што каштоўнасць перапіскі не ў тым, што яна вядзецца на паперы, а ў тым, што перастала існаваць магчымасць імгненнага кантакту. Я вось вельмі сумую па SMS і сацыяльных камунікацыях. Але не так моцна, каб хвалявацца. Так што каштоўнасць зносін заўсёды была высокай, проста раней яе рэалізацыя была без абмежаванняў. Перадавай ад мяне прывітанні ўсім, каго сустрэнеш у чэргах. Я выдатна разумею, што яны не ўсе хацелі тварыць гісторыю, але трапіць у будучыя падручнікі — гэта дарагога варта. Як аказалася. Нічога няма вечнага і нязменнага. Як сказана ў выдатнай кнізе: «Мы не выбіраем час, у якім нам жыць, але мы выбіраем шлях, па якім нам ісці ў гэты час». І я ўпэўнены, мы можам ганарыцца тым шляхам, па якім нам выпала ісці. Яшчэ раз усім прывітанні і пажаданні ўсяго найлепшага! Усё будзе добра!»
Цяпер чытаюць
Міліцыя схавала галоўнае — магілёўскі маньяк-ліфцёр ужо сядзеў за згвалтаванне. Але яго не праверылі на датычнасць да забойстваў9
Каментары