Абвастрыўся памежны канфлікт паміж Кыргызстанам і Таджыкістанам, бакі пачалі нават страляць, паведамляе Sputnik Таджыкістан. Хто пачаў першы, пакуль сказаць цяжка.
З Бішкека паведамілі пра перастрэлку на мяжы дзвюх краін. Прычынай абвастрэння там назвалі дзеянні таджыкскага боку, які ў аднабаковым парадку перакрыў участак дарогі ў мясцовасці Торт-Качо Баткенскага раёна, якая злучае кіргізскія гарады Баткен і Ісфану, чым і справакавала канфлікт.
Кыргызы кажуць, што таджыкскі бок выкарыстоўвае мінамёты і гранатамёты.
Таджыкскія памежнікі, у сваю чаргу, сцвярджаюць, што першымі стральбу пачаў кыргызскі бок, а яны самі толькі адкрылі агонь у адказ.
«Трое таджыкскіх вайскоўцаў параненыя, іх даставілі ў Цэнтральную клініку горада Ісфара», — паведамляе «Sputnik Таджыкістан».
Пазней Sputnik паведаміў, што таджыкскі бок спыніў агонь. Пры гэтым улады краіны абвясцілі ў гэтым рэгіёне казарменнае становішча і сцягнулі туды сілы Дзяржкамітэта нацбяспекі, міліцыі і арміі.
Мяжа Кыргызстана і Таджыкістана перыядычна становіцца зонай канфліктаў паміж мясцовымі жыхарамі і памежнікамі дзвюх краін, якія ўзнікаюць з-за недэлімітызаваных участкаў. На іх немагчыма вызначыць, як пралягае мяжа паміж дзяржавамі.
У канцы красавіка мінулага года ў тым жа самым раёне канфлікт жыхароў на водазаборы «Галаўны» перарос ва ўзброенае супрацьстаянне вайскоўцаў дзвюх краін. Загінулі 36 грамадзян Кыргызстана, яшчэ каля 200 пацярпелі. Таджыкістан паведаміў пра 19 загінулых і 87 пацярпелых, больш за 300 дамоў і інфраструктурных аб'ектаў былі разбураныя ці спаленыя.
Цяпер чытаюць
Вызваленыя беларускія палітвязні паразмаўлялі з Зяленскім4
Каментары