Беларуская актрыса даведалася пра цяжарнасць толькі на пятым месяцы. Гэта распаўсюджаная з’ява?
Актрыса Марына Паддубная падзялілася радаснай навіной: у яе з рэжысёрам Мітрыем Сямёнавым-Алейнікавым нарадзілася дачка. У асобным «мамскім» інстаграме Марына расказала, што даведалася пра цяжарнасць толькі на пятым месяцы.
«Не было ніякіх сімптомаў, не было набору вагі, ацёкаў, таксікозу, праблем са скурай, настроем, ціскам», — расказвае жанчына ў сацсетках.
У каментарах у яе спыталі — а што наконт менструцыі? На што маладая маці здзівіла: таксама прысутнічала.
Наколькі гэта стандартная з’ява?
Акушэр-гінеколаг Станіслаў Салавей ў каментары «Нашай Ніве» распавёў, што гісторыя Марыны — не ўнікальная: кожны спецыяліст з досведам згадае такі кейс са сваёй практыкі.
«Жанчыны ў большасці сваёй не заўважаюць цяжарнасці з пункту гледжання таксікозу, ванітаў — гэта не заўсёды адбываецца. Плюс не ва ўсіх жанчын моцна выступае жывот на сярэдніх тэрмінах, а ёсць тыя, хто ў целе, у іх цяжарнасць можа быць не моцна заўважная і на восьмым месяцы. У мяне, напрыклад, была пацыентка, якая прыйшла да мяне ўжо пад самыя роды і не ведала, што цяжарная», — каментуе доктар.
Што тычыцца наяўнасці месячных, тут суразмоўца падкрэслівае, што кравяністыя выдзяленні падчас цяжарнасці — гэта ні ў якім разе не класічная менструацыя.
«Калі крывацёкі ў цяжарнай — гэта можа казаць пра патэнцыйную пагрозу перарывання цяжарнасці, якая працякае ў такім выглядзе — кравяністых выдзяленняў. Гэта не заўсёды патрабуе лячэння, але фармальна гэта — ускладненне і не норма. Ёсць яшчэ сітуацыі, звязаныя з полікістозам яечнікаў і залішняй масай цела, калі месячныя ў прынцыпе нерэгулярныя — раз у тры месяцы ці з паўгадовай затрымкай, і гэта ўсё ўскладняе шанцы зацяжарыць. Таму такія пацыенткі нярэдка не засцерагаюцца падчас сэксу, кажуць: я ж усё роўна не зацяжару. Але ўсё здараецца, месячных як не было раней рэгулярна, так і няма, і даведваюцца пра цяжарнасць такія жанчыны позна».
Яшчэ адна катэгорыя жанчын, для якіх цяжарнасць часцей робіцца сюрпрызам на позніх тэрмінах, — ва ўзросце 45+.
«Калі месячныя знікаюць у такім узросце, прыходзяць думкі: мабыць, ужо клімакс. І тую ж вагу, якая можа пачаць расці, спісваюць на яго, а гэта можа быць цяжарнасць. Такія пацыенткі нярэдка паступаюць з болямі ў жываце ў хірургію, а па факце ў іх пачынаюцца роды».
Што да пераменаў з ціскам, то павышэнне можа назірацца звычайна пасля 22 тыдняў.
«Калі гэта адбываецца на ранейшых тэрмінах, гэта сведчыць, што ў пацыенткі ўжо да гэтага мела месца артэрыяльная гіпертэнзія».
Ці стала болей пасля каранавіруса сардэчна-сасудзістых захворванняў? Вось што заўважылі беларускія дактары
Памятаеце дзяўчынку, якая памерла ў радзільні праз тое, што маці не зрабілі кесаравага? Стала вядома, чым скончылася праверка
«У мяне сваяк — пілот, ён прывозіць». Як у Беларусі прадаюць «Азэмпік», які абяцае фігуру мары
Каментары