«Усё пачынаецца з таго, што ў адзін дзень табе гавораць, што такога-та чысла прыязджае ВСА — вышэйшая службовая асоба. І ты разумееш, што прападае і гэты дзень, і наступны».
У новым выпуску ТОКу прадстаўнік аб'яднання былых сілавікоў «Белпол» Уладзімір Жыгар расказаў, як міліцыянеры ахоўвалі Лукашэнку падчас яго паездак у рэгіёны.
«Усё пачынаецца з таго, што ў адзін дзень табе гавораць, што такога-та чысла прыязджае ВСА — вышэйшая службовая асоба. І ты разумееш, што прападае і гэты дзень і наступны», — заўважае Жыгар і расказвае, што ў дзень прыезду Лукашэнкі ў аддзел трэба было прыбыць а 3-4-й гадзіне ранку.
Там выдавалі неабходную экіпіроўку (гумовую палку, радыёстанцыю і наручнікі) і на аўтобусе адвозілі на базу, дзе збіраліся міліцыянеры з усіх раённых аддзелаў міліцыі вобласці.
Пасля, як згадвае Жыгар, супрацоўнік службы бяспекі Лукашэнкі праводзіў інструктаж, называюць пазыўныя, а затым на аўтобусах міліцыянераў развозілі па горадзе. У выпадку Жыгара гэта быў Гомель.
«Табе гавораць: «Стаяць тут». Пазней прыязджае адказны за гэты сектар. Удакладняе твае даныя, звярае пазыўныя для радыёстанцыі. Ты пытаешся: «А калі ён прыедзе?». Табе гавораць, што праз гадзіны тры-чатыры. І ты стаіш на холадзе. У цябе дзесяць метраў у адзін бок і пяць у іншы. І ты ходзіш», — расказвае былы сілавік.
На сваіх пазіцыях, па словах Жыгара, міліцыянеры застаюцца яшчэ працяглы час пасля таго, як Лукашэнка зляціць назад:
«Табе на радыёстанцыю прыходзіць апавяшчэнне, што «першы злятае», і ты чакаеш да асобага распараджэння. Ты пасля можаш хадзіць яшчэ паўтары гадзіны, пакуль яго не будзе. Пасля асобага распараджэння можна на лаўку сесці.
Затым усіх збірае аўтобус, дастаўляе на базу. Там ты перасядаеш у свой аўтобус і вяртаешся дахаты. Як правіла, каля 12 гадзін ночы. Пакуль здасі ўсе спецсродкі, абмундзіраванне, дахаты вяртаешся позна. А 8-й гадзіне ранку ты павінен быць на рабоце».
Жыгар расказаў пра цікавы выпадак, які з ім адбыўся падчас удзелу ў мерапрыемствах па ахове Лукашэнкі. Аднойчы яго паставілі каля жылога дома:
«Я хаджу кругамі вакол дома. Падыходзіць маладая пара: «Добры дзень, як вы?» Я кажу: «Дзякуй. Усё добра». Сам думаю: «Добра, што хоць спыталі». Праз некаторы час яны зноў прыходзяць. У іх піца, яны адкрываюць «Колу», сядзяць, ядуць, размаўляюць.
І потым у мяне спрацоўвае радыёстанцыя. Я яе трохі прыглушаю, але чую, што іншая [радыёстанцыя] недзе гаворыць. Я да пары прыглядаюся, і чую: «Першы прылятае». Яны пакідаюць усю сваю ежу, збіраюцца і сыходзяць».
Па словах Жыгара, гэта былі супрацоўнікі Службы аховы Лукашэнкі.
«Яны глядзелі за мною. А я думаў, што гэта проста звычайныя людзі», — гаворыць былы сілавік.
Глядзіце выпуск цалкам:
Цяпер чытаюць
Расійскія і лукашэнкаўскія спецслужбы на фоне залёту дронаў у Польшчу правялі інфаатаку. Яе зладжанасць дае падставы думаць, што залёт быў спланаваны1616
Каментары