Суддзя Акружнога суда па акрузе Калумбія Таня Чуткан задаволіла просьбу спецыяльнага пракурора Джэка Сміта спыніць крымінальны пераслед абранага прэзідэнта ЗША Дональда Трампа па справе аб спробе адмяніць вынікі прэзідэнцкіх выбараў 2020 года, піша Бі-бі-сі.
«Суд задаволіў хадайніцтва пракуратуры аб спыненні разгляду справы», — гаворыцца ў заяве Чуткан, якая вяла гэты працэс.
Сміт заявіў, што справа павінна быць закрыта з-за палітыкі Міністэрства юстыцыі, якое забараняе судовае пераследаванне дзейнага прэзідэнта ЗША.
«Пазіцыя Мінюста заключаецца ў тым, што Канстытуцыя патрабуе, каб гэтая справа была спынена да таго, як абвінавачаны ўступіць у пасаду», — падкрэсліў Сміт, удакладніўшы, што «пазіцыя абвінавачвання па сутнасці справы не змянілася, але змяніліся абставіны».
Сміт вёў два расследаванні супраць Трампа — аб яго спробе адмяніць сваю паразу на выбарах 2020 года і аб абыходжанні з сакрэтнымі дакументамі. Па другой справе Сміт таксама прасіў закрыць яе.
Каманда Трампа назвала гэта «вялікай перамогай вяршэнства закона».
«Амерыканскі народ пераабраў прэзідэнта Трампа з пераканаўчым мандатам, каб зрабіць Амерыку зноў вялікай», — сказаў прадстаўнік Трампа Стывен Чанг (у новай адміністрацыі ён стане дырэктарам па камунікацыях). — «Амерыканскі народ і прэзідэнт Трамп хочуць неадкладна пакончыць з палітычным выкарыстаннем нашай сістэмы правасуддзя, і мы з нецярпеннем чакаем аб'яднання нашай краіны».
Трамп паабяцаў звольніць Сміта, як толькі ўступіць у пасаду прэзідэнта. Паводле наяўных даных, Сміт плануе пайсці ў адстаўку ў наступным годзе.
Перамога Трампа на выбарах пакінула некалькі крымінальных спраў супраць яго ў падвешаным стане.
Вынясенне прысуду па крымінальнай справе ў штаце Нью-Ёрк было адкладзена на неабмежаваны тэрмін.
Трампу таксама выстаўленыя абвінавачванні ў спробы адмяніць вынікі выбараў у штаце Джорджыя, але і гэтая справа адкладаецца.
Па словах былога федэральнага пракурора Німы Рахмані, з таго часу, як Трамп перамог на мінулых прэзідэнцкіх выбарах, «яго крымінальныя праблемы зніклі».
«Абсалютна вядома, што дзейны прэзідэнт не можа быць прыцягнуты да адказнасці», — сказаў ён.
Чаму YouTube выдаліў каналы БелТА, СТБ і АНТ? Вось што вядома11
Каментары