Пропаведзь Z-бацюшкі і рэабілітацыя Паўліка Марозава. Як у Свята-Елісавецінскім манастыры вучаць падлеткаў патрыятызму

Дзеці з гранатамётам

У сярэдзіне лютага 2025 года на сайце Свята-Елісавецінскага манастыра (СЕМ) з'явілася запрашэнне ўсім ахвотным узяць удзел у «сямейна-патрыятычным форуме з удзелам вядомых спікераў». Мерапрыемства прымеркавалі да 23 лютага, яно праходзіла пад лозунгам «Выхаваем патрыётаў — абаронім Айчыну!».

Па словах арганізатараў — праваслаўнага руху «Арляняты» — яго праграма ўпершыню ўключае ў сябе «сувораўскія гульні» для старшакласнікаў — спартыўныя, стратэгічныя, інтэлектуальныя спаборніцтвы, якія таксама праходзілі ў сценах манастыра.

Тэлеграм-канал «Хрысціянская візія» апублікаваў фота і відэа, зробленыя ў першы дзень форуму. На іх цалкам экіпіраваныя ў вайсковую форму (каскі, бронекамізэлькі) дзеці пазіруюць ужо не толькі з аўтаматамі, але таксама з кулямётамі і нават аўтаматычным станковым гранатамётам. На падставе здымкаў у тэлеграм-канале немагчыма сцвярджаць, сапраўдная гэта зброя ці толькі яе макеты. Таксама на стале ляжыць дрон і пульт кіравання да яго.

Здымкі былі зробленыя 22 лютага, у дзень старту «сувораўскіх гульняў», у анонсе якіх сказана, што яны праводзяцца «з мэтай выхавання любові да сваёй Радзімы, фарміравання разумення маладым пакаленнем каштоўнасці захавання гістарычнай памяці, а таксама раскрыцця спартыўнага і творчага патэнцыялу падлеткаў».

На практыцы яны ўяўляюць сабой вайскова-патрыятычныя спаборніцтвы падлеткавых каманд з розных гарадоў Беларусі, падчас якіх яны спаборнічаюць у стральбе, перацягваюць канат, гуляюць у шахматы і займаюцца армрэслінгам.

Павялічыць

Чэмпіён па колцы дроў

У рамках форуму юным удзельнікам было таксама прапанавана паслухаць выступленні запрошаных спікераў. Сярод іх «Вот так» выявіў іерэя Дзмітрыя Новікава, настаяцеля прыхода храма Свяціцеля Мікалая Цудатворца ў Салігорску, які расказаў падлеткам пра выхаванне сілы волі праз спорт.

Вядомасць гэтаму святару прынесла не толькі ягонае захапленне гірамі, але і заклікі да ўдзелу ў датэрміновым галасаванні на нядаўніх прэзідэнцкіх выбарах у Беларусі. Удзел у выбарах у роліку, знятым на выбарчым участку, ён назваў «важным крокам да поспеху нашай краіны», а само галасаванне, якое праходзіла ва ўмовах рэпрэсій і ціску на выбаршчыкаў — «добрай справай».

У якасці матывацыйнага прыкладу ён назваў бацькоў Ісуса Хрыста, якія ўдзельнічалі ў перапісе насельніцтва ў Старажытнай Юдэі — «у дзяржаўным жыцці краіны», як падкрэсліў Новікаў. Таму, паводле яго слоў, і хрысціяне павінны «прыступіць да галасавання».

Яшчэ адзін спікер, які выступіў на праваслаўным форуме, — дырэктар Бараўлянскага лясгаса Аляксандр Мірановіч, — «праславіўся» ўдзелам у дэмантажы сотняў крыжоў у Курапатах у 2019 годзе.

Падлеткам кіраўнік лясгаса, які арганізуе майстар-класы Лукашэнкі па колцы дроў і перамагае ў рэспубліканскім першынстве ў намінацыі «колка дроў па-прэзідэнцку», расказаў, «што значыць быць патрыётам».

Пасля Мірановіча да мікрафона выйшаў духоўнік моладзевага аддзела БПЦ протаіерэй Алег Абрамовіч. Ён вядомы сваімі рэгулярнымі візітамі ў сілавыя структуры і правядзеннем у іх сценах рэлігійных цырымоній. У сакавіку 2024 года Абрамовіч узяў удзел у святкаванні 107-годдзя беларускай міліцыі, а таксама ў форуме ветэранаў вайсковай разведкі.

Павялічыць

У падпісках Абрамовіча на яго асабістай старонцы «Укантакце» разам з праваслаўнымі супольнасцямі — шэраг старонак, якія прапагандуюць «рускі свет» і падтрымліваюць агрэсію супраць Украіны (напрыклад, «Россия — это я!, «ZAVGOR», «Вежливые люди», «Бесогон»), а таксама старонкі эратычнага зместу.

У стужцы ён рэгулярна рэпосціць гэтыя і іншыя рэсурсы, выказваючы сваю падтрымку вайне ва Украіне і высмейваючы праціўнікаў Аляксандра Лукашэнкі. Падлеткам і іх бацькам 23 лютага ён расказваў пра «хатнюю царкву».

Прыклад Паўліка Марозава

На заканчэнне другога дня мерапрыемства ўдзельнікам форуму і гульняў прапанавалі паглядзець некалькі дакументальных фільмаў. Адзін з іх — «Патрыятычнае выхаванне ў Расіі». «Вот так» знайшоў у інтэрнэце толькі адзін фільм з такой назвай. Ён размешчаны на федэральным партале гісторыі Расіі (история.рф) — «галоўным гістарычным партале краіны».

У паўгадзінным відэа гісторык Святлана Чудзінава расказвае пра патрыятычнае выхаванне дзяцей і падлеткаў у Расійскай Імперыі і Савецкім Саюзе.

Цікавасць у кантэксце праваслаўнага характару мерапрыемства выклікаюць характарыстыкі, якія ў дакументальным фільме даюцца савецкаму перыяду, у якім дзіцяча-юнацкія арганізацыі былі актыўна задзейнічаныя ў ганеннях на царкву. Праўда, пра гэты аспект дзейнасці піянераў Чудзінава прамаўчала.

Затое яна фактычна рэабілітавала Паўліка Марозава, вядомага тым, што данёс уладам на свайго бацьку, які нібыта дапамагаў «кулакам».

«Піянеры дапамагалі дарослым і ў барацьбе з контррэвалюцыяй. Сярод піянераў-герояў першае месца заўсёды займаў Паўлік Марозаў. Паводле афіцыйнай версіі, ён данёс на свайго бацьку, што той дапамагаў кулакам хаваць збожжа і хавацца ад закона. Пасля гэтага Паўліка і ягонага малодшага брата найбліжэйшыя сваякі забілі. Гісторыя досыць складаная і заблытаная… Але тое, што здзейсніў Паўлік — гэта ўчынак не здрадніка, а чалавека, які хацеў прынесці карысць сваёй краіне», — адзначыла Чудзінава на фоне візуальнага шэрагу з прапагандысцкіх плакатаў і фатаграфій дзяцей са Сталіным і Брэжневым.

Павялічыць

Арляняты патрыярхату

«Арляняты» былі створаныя непасрэдна пры манастыры ў маі 2021 года. На сайце руху пазначана, што першы злёт адбыўся 15 мая 2021 года і быў прысвечаны «800-годдзю з дня нараджэння святога дабравернага князя Аляксандра Неўскага».

Ядром «Арлянят» сталі выхаванцы нядзельнай школы пры манастыры і створанай яго манашкамі праваслаўнай школы «Іхвіс». На першым жа злёце дзяцей навучалі не толькі біблейскім «лагоднасці і пакоры», але таксама зборцы і разборцы аўтаматаў, падрыхтоўцы да стральбы і аказанні першай дапамогі параненым.

Традыцыя атрымала працяг і на наступных мерапрыемствах дзіцяча-юнацкага руху. Напрыклад, у верасні 2022 года госцем «Арлянят» стаў кіраўнік беларускага вайскова-патрыятычнага цэнтра «Казачы спас» Пятро Шапко, вядомы супрацоўніцтвам з былым «міністрам абароны ДНР» Ігарам Стралковым-Гіркіным, вярбоўкай баевікоў ва Украіну і арганізацыяй вайсова-патрыятычных лагераў для дзяцей ва ўзросце 14-18 гадоў на тэрыторыі Беларусі.

На фотаздымках з аднаго з мерапрыемстваў «Арлянят» Шапко дзеці і падлеткі на тэрыторыі манастыра занятыя зборкай і разборкай аўтаматычнай зброі.

У ходзе сямейна-патрыятычнага форуму 23 лютага 2025 года Шапко выступіў з лекцыяй «Выхаванне хлопчыкаў і ўплыў камфортнага жыцця на ўспрыманне штодзённай рэальнасці».

24-25 лютага мінулага года ў манастырскім цэнтры «Каўчэг» адбылася арганізаваная «Арлянятамі» гульня для падлеткаў, падчас якой удзельнікі гулялі з сапраўднай зброяй на фоне вывешанага ў духоўна-асветніцкім цэнтры вялікага партрэта Сталіна.

Павялічыць

Акрамя гэтага, «Арляняты» ў сілу сваіх магчымасцяў удзельнічаюць і ў падтрымцы расійскай агрэсіі супраць Украіны. Напрыклад, у красавіку 2023 года стала вядома, што беларускіх дзяцей і падлеткаў служыцелі Свята-Елісавецінскага манастыра прыцягнулі да напісання лістоў «у суцяшэнне рускім воінам». 

• 1
• 4
• 0
• 4
• 0
• 0
• 12
• 0