У Гродне чыноўнікі і бюджэтнікі праводзяць флэшмоб: дружна плачуць, што ў іх забралі Караніка
«Скажы дзякуй губернатару!» — пасты пад такім загалоўкам з’явіліся ў сацсетках Гродзенскага аблвыканкама «Пул 4 Рэгіён». А ў сторыз — пасты і рылз ад няпростых гродзенцаў і жыхароў вобласці, якія дзякуюць Уладзіміру Караніку, шкадуюць, што ён пайшоў з пасады «губернатара» на віцэ-прэм'ерства ў Мінск, і нават плачуць на камеру, піша Hrodna.life.
«Дзякуем за ўсё» і «Гэта быў круты час Гродзенскай вобласці» напісала 18-гадовая Марыя Мацюк, старшыня Рэспубліканскай рады навучэнцаў каледжаў і Гродзенскай абласной рады навучэнцаў каледжаў. Даслоўна тое самае напісала і яе маці, Алена Мацюк — майстрыха вытворчага навучання Гродзенскага прафесійна-тэхнічнага каледжа побытавага абслугоўвання, кіраўніца першаснай арганізацыі ГА «Беларускі саюз жанчын» і актыўная ўдзельніца гарадскіх мерапрыемстваў.
«Найлепшы губернатар Гродзенскай вобласці», — напісала эстрадная выканаўца Аліна Чыжык, артыстка года Гродзеншчыны-2022, уладальніца вакальнай школы. У наступным відэа яна нават расплакалася:
«Мне будзе вельмі сумна ўсведамляць, што ён больш не губернатар нашай вобласці. Я не ведаю, чаго я плачу, але апошнія пяць гадоў — гэта быў такі ўзлёт у маёй кар’еры, у момант, калі Уладзімір Сцяпанавіч узначальваў нашу вобласць. Дзякуючы яму я стала і Чалавекам года Гродзеншчыны, пабывала і ў Кітаі, і ў Індыі».
Далей яна апублікавала яшчэ сем рылз, прысвечаных Караніку.
З новай пасадай Караніка павіншавалі рэктар Гродзенскага медыцынскага ўніверсітэта і член Савета Рэспублікі Ігар Жук, намеснік загадчыка аддзела праектнай дзейнасці Гродзенскага АК ГА «БРСМ» Пётр Касіцкі, першая сакратарка Астравецкага раённага камітэта ГА «БРСМ» Вольга Максімава, намесніца старшыні камісіі па сацыяльнай палітыцы і ахове здароўя Маладзёжнага парламента пры Нацыянальным сходзе Дар’я Раманіна, студэнт-журналіст і супрацоўнік канала «Гродна Плюс» Ягор Скепка, дырэктар Валеўскай сярэдняй школы Андрэй Падліпскі.
Віншаванні і падзякі апублікавалі акаўнты Рады працоўнай моладзі Лідскага раёна, Гродзенскага музычнага каледжа, Гроднааблкінавідэапраката, баскетбольнага клуба «Прынёманне».
«Такая ўвага вельмі прыемная! Паверце, Уладзімір Сцяпанавіч усё бачыць, усё чытае!», — напісалі ў канале «Пул 4 Регион».
Каментары