У аэрапортах Масквы і Санкт-Пецярбурга ўзнік калапс з-за атакі дронаў
У аэрапортах Масквы і Санкт-Пецярбурга ўзніклі сур’ёзныя праблемы з вылетамі з-за пагрозы атак беспілотнікаў.
З 5 ліпеня праца галоўных расійскіх аэрапортаў часова спынялася. У Шарамеццеве адмянілі 174 рэйсы, з якіх каля 80% — рэйсы групы «Аэрафлот». Яшчэ 47 рэйсаў былі затрыманыя больш чым на дзве гадзіны.
Пасажыры некаторых рэйсаў «Аэрафлота» чакаюць вылету з мінулага дня. Напрыклад, рэйс у Мале, які павінен быў вылецець у суботу ў 22:35, спачатку перанеслі на 7:00 раніцы, але да 9:30 наступнага дня ён так і не адбыўся. Рэйс з Калінінграда адмянілі пасля дзесяцігадзіннага чакання, без забеспячэння ежай, вадой ці гатэлем. Рэйс з Мінеральных Вод затрымліваўся больш за 15 гадзін — пасажыраў змясцілі ў гатэль толькі ўначы. Падобная сітуацыя была і з рэйсам з Алматы.
У пецярбургскім аэрапорце «Пулкава» таксама назіраюцца вялікія затрымкі і адмены: адмянілі 11 рэйсаў, каля 60 затрымаліся. Людзі вымушаныя сядзець і ляжаць на падлозе, бо залы перапоўненыя. Таксама перанесены амаль 90 рэйсаў, якія павінны былі прыбыць у Пулкава.
Праблемы з вылетамі закранулі і іншыя гарады Расіі: Екацярынбург, Ніжні Ноўгарад, Калінінград, Сочы ды іншыя.
Расійскае Мінабароны паведаміла, што за суткі расійская ППА збіла 298 украінскіх дронаў. Больш за ўсё іх было, як сцвярджаецца, знішчана над Бранскай, Курскай, Арлоўскай, Белгародскай і Тульскай абласцямі.
Цяпер чытаюць
Хто тая Аліна, з якой Лукашэнка танцаваў гэтым разам на навагоднім балі23
Каментары