Прэзідэнт Літвы павіншаваў беларусаў з Днём Волі: «Ваша рашучасць і стойкасць натхняюць»
Прэзідэнт Літвы Гітанас Наўседа звярнуўся да беларускага народа з нагоды Дня Волі. У сваім віншаванні ён падкрэсліў непахісную падтрымку дэмакратычных памкненняў Беларусі і адзначыў глыбокую гістарычную сувязь паміж дзвюма краінамі. Прыводзім тэкст.
Ад імя народа Літвы хачу павіншаваць усіх беларусаў, якія сёння адзначаюць Дзень Волі. Гэты дзень сімвалізуе ваша нястомнае імкненне да свабоды, незалежнасці і суверэнітэту і з’яўляецца вельмі важным для ўсіх людзей, якія шануюць правы чалавека і дэмакратыю.
Як вашы суседзі, мы зблізку назіраем за вашай адважнай барацьбой за гэтыя агульначалавечыя каштоўнасці. Ваша рашучасць і стойкасць натхняюць мноства людзей і ўсёй міжнароднай супольнасці пастаянна нагадваюць, наколькі важнай з’яўляецца салідарнасць народаў і паслядоўная падтрымка тых, хто імкнецца да сваіх асноўных правоў.
Дзень Волі — гэта не толькі дзень, калі вы ўспамінаеце сваю барацьбу за свабоду на розных гістарычных этапах і ахвяры тых, хто змагаўся за свабодную волю народа. Гэта таксама дзень разважанняў аб будучыні — еўрапейскай будучыні Беларусі, у якой усе беларусы будуць карыстацца ўсімі свабодамі і магчымасцямі, якіх яны вартыя.
Літву і Беларусь яднае агульная шматвяковая гісторыя, агульная культурная спадчына і блізкія чалавечыя сувязі. Літва актыўна падтрымлівае беларускую грамадзянскую супольнасць і імкнецца паспрыяць таму, каб галасы беларусаў у міжнароднай супольнасці былі пачутыя.
Сёння, як і кожны дзень, хачу яшчэ раз запэўніць, што падтрымка Літвой дэмакратычнай Беларусі, яе незалежнасці і суверэнітэту з’яўляецца непахіснай. Мы падтрымліваем волю ўсіх людзей Беларусі жыць у свабоднай і дэмакратычнай дзяржаве. Літва прызнае імкненні, выказаныя беларускімі дэмакратычнымі сіламі і іх лідаркай Святланай Ціханоўскай, будаваць дэмакратычную і еўрапейскую будучыню Беларусі.
Жадаю заставацца моцнымі і адзінымі перад тварам усіх выклікаў, з якімі вы сутыкаецеся штодня. І далей змагайцеся за свабоду сваёй краіны, не дазваляйце выкарыстоўваць сваю дзяржаву ў расійскай ваеннай агрэсіі супраць Украіны.
Няхай гэты Дзень Волі будзе маяком надзеі, які асвятляе шлях да лепшай будучыні Беларусі — такой, у якой трыумфуюць дэмакратыя, справядлівасць і правы чалавека. Няхай гэты дзень наблізіць вас усіх да ажыццяўлення імкнення да свабоднай, незалежнай, квітнеючай і еўрапейскай Беларусі.
Gyvuok, Baltarusija! Жыве Беларусь!
Чаму YouTube выдаліў каналы БелТА, СТБ і АНТ? Вось што вядома10
Каментары
[Зрэдагавана]