«Расплакаўся і пачаў прасіць прабачэння». Жыхар Вільні расказаў, як злавіў 14‑гадовага падлетка, які пісаў «Вільня наша»
Падлетак размаўляў па-літоўску без акцэнту.
У сераду раніцай паліцыя ў цэнтры Вільні затрымала непаўналетняга, які на набярэжнай Вяллі напісаў фарбай надпіс «Вільня наша». Высветлілася, што парушальніка спыніў мінак — больш падрабязнасцей пра інцыдэнт ён раскрыў выданню LRT.lt.
Паводле слоў Паўлюса, ён убачыў незвычайнае відовішча раніцай па дарозе на працу.
«Я бачыў, што чалавек сядзіць на кукішках, нешта робіць. Я не звяртаў асаблівай увагі, але, калі падышоў бліжэй, заўважыў, што чалавек з капюшонам, апрануты ў чорнае, нешта фатаграфуе», — сказаў ён.
Потым суразмоўца ўбачыў, што чалавек фатаграфуе надпіс кірыліцай — Паўлюс ужо чуў пра такія надпісы ў Вільні, ведаў, што яны, паводле падазрэнняў праваахоўных органаў і спецслужбаў, прызначаны для таго, каб пасеяць разлад у Літве, а іх з'яўленне арганізавана расійскімі і беларускімі службамі.
Нядаўна графіці ў падобным стылі з'явіліся ў розных сімвалічных месцах Вільні, напрыклад, каля Дома ўрада на плошчы Кудзіркі і Беларускай гімназіі.
«Я спытаў: што вы тут робіце?» Ён паглядзеў на мяне, зразумеў, што яго злавілі, і пачаў уцякаць», — успомніў Паўлюс. Ён пачаў пераследваць уцекача.
Калі хлопец дабраўся да праспекта Гедыміна, Паўлюс пачаў крычаць, заклікаючы мінакоў затрымаць хлопца. У рэшце рэшт той спатыкнуўся, упаў, і мужчына прыціснуў яго да зямлі.
Паводле слоў Паўлюса, затрыманы пачаў казаць, што яму ўсяго 14 гадоў, расплакаўся і пачаў прасіць прабачэння.
«Ён сказаў, што не хацеў нічога маляваць, што зрабіў гэта таму, што яму пагражалі, што, калі ён не намалюе гэтыя словы і не сфатаграфуе, яго дом спаляць», — дадаў суразмоўца.
Паводле яго слоў, паліцыя, якая прыехала, сказала, што ведае гэтага маладога чалавека.
Акрамя таго, Паўлюса ўразіла тое, што падлетак размаўляў па-літоўску без акцэнту.
Ён сам падкрэсліў, што на затрыманне злачынцы яго матывавала прыналежнасць да Саюза стралкоў, дзе ён рыхтаваўся як фізічна, так і псіхалагічна, і што ён ведаў аб правакацыях, звязаных з Расіяй праз апаганьванне помнікаў у краінах Балтыі. Па словах Паўлюса, ён рады, што яму ўдалося злавіць злачынца.
Каментары