Трамп хоча пазбавіць права голасу ў НАТА тыя краіны, якія трацяць на абарону менш за 5% ВУП
Паводле інфармацыі брытанскага выдання The Telegraph, прэзідэнт ЗША Дональд Трамп разглядае магчымасць радыкальна змяніць правілы ўнутры альянсу.
Гаворка ідзе пра тое, каб краіны, якія трацяць на абарону менш за 5% свайго ВУП, маглі страціць права голасу пры прыняцці важных рашэнняў. Гэта тычыцца, напрыклад, пытанняў пашырэння альянсу, выкарыстання артыкула аб калектыўнай абароне і правядзення сумесных аперацый. Паводле крыніц, ідэя заключаецца ў тым, што краіны не павінны ўплываць на рашэнні, калі яны не нясуць дастатковых выдаткаў.
Паведамляецца, што Трамп пачаў сур’ёзна разважаць над гэтым пасля таго, як саюзнікі па НАТА фактычна не падтрымалі ЗША ў сітуацыі на Блізкім Усходзе.
Таксама ў Вашынгтоне абмяркоўваюць магчымасць вываду амерыканскіх войскаў з Германіі — гэтая ідэя з’явілася адразу пасля вяртання Трампа ў Белы дом.
Пры гэтым афіцыйна гэтыя прапановы пакуль не прадстаўляліся ў Бруселі. Унутры НАТА ўсе рашэнні прымаюцца толькі з агульнай згоды ўсіх краін, таму падобныя ініцыятывы могуць быць заблакаваныя і прывесці да напружанасці паміж саюзнікамі.
Варта адзначыць, аднак, што на сённяшні дзень ніводная краіна альянсу, уключаючы ЗША, не дасягае ўзроўню ў 5% ВУП, выдаткаваных на абарону. Найбольш трацяць Польшча, Літва, Латвія і Эстонія (ад 4,8% да 3,43%), але нават яны не дацягваюць да гэтай адзнакі. Самі ж ЗША плануюць у 2026 годзе выдаткаваць на вайсковыя выдаткі каля 3,3—3,4% свайго ВУП.
Каментары