У гомельскага «бамбілы» забралі аўто пасля «кантрольнай закупкі»
Прыватны таксіст аштрафаваны, а яго аўтамабіль канфіскаваны. Жыхар абласнога цэнтра двойчы прыцягваўся да адміністрацыйнай адказнасці за занятак прадпрымальніцкай дзейнасцю без дзяржаўнай рэгістрацыі.
Метадам кантрольнай закупкі яго зноў праверылі супрацоўнікі інспекцыі Міністэрства па падатках і зборах па Цэнтральным раёне Гомеля і зноў выкрылі парушэнне.
Падчас разгляду справы ў гаспадарчым судзе Гомельскай вобласці кіроўца сваёй віны не прызнаў. Ён заявіў, што не атрымліваў матэрыяльнага ўзнагароджання ад пасажыраў. Разам з тым высветлена, што ён перыядычна займаўся прадпрымальніцкай дзейнасцю, паколькі не меў сталага месца працы.
Як паведаміла суддзя Святлана Дзям'янчык, яго прызналі вінаватым і аштрафавалі на 70 базавых велічынь, а аўтамабіль «Опель Вектра» канфіскавалі ў даход дзяржавы.