Бюджэту Беларусі не хапае $750 мільёнаў. Мінфін: Грошы браць няма адкуль
Дэфіцыт бюджэту Беларусі па выніках 2013 года, імаверна, дасягне 7 трыльёнаў рублёў. Гэта каля $750 мільёнаў у эквіваленце.
«Нават прыцягненне дадатковых даходаў і маштабнае абмежаванне выдаткаў не дазваляюць ліквідаваць разрыў», — заявіў намеснік міністра фінансаў Максім Ермаловіч.
Гэтая ацэнка была зроблена па выніках работы эканомікі за студзень-верасень 2013 года.
«Для звядзення балансу спатрэбіцца выкарыстоўваць раней назапашаныя рэшткі сродкаў бюджэту, якія пераважна сфарміраваны за кошт сродкаў фонду нацыянальнага развіцця. Іншыя рэзервы ў дадзены момант практычна вычарпалі сябе», --
цытуе Ермаловіча «Інтэрфакс».
У Фонд нацыянальнага развіцця пералічваюць частку прыбытку высокарэнтабельныя прадпрыемства — нафтаперапрацоўчыя заводы, «Беларуськалій» ды іншыя.
Намеснік міністра фінансаў адзначае, што магчымасці па скарачэнні дэфіцыту за кошт далейшага змяншэння выдаткаў вельмі абмежаваныя:
«Далейшае зніжэнне фінансавання немінуча пацягне за сабой пагаршэнне ўмоваў працы для бюджэтнага сектара».