Швейцарыя ўзаконіла выразы «замежная свіння» і «бежанец дзярмовы»
Федэральны суд Швейцарыі не прызнаў выкарыстанне выразаў «замежная свіння» і «бежанец дзярмовы» праявамі расізму. Пра гэта паведамляе газета Blick са спасылкай на рашэнне суда.
Такім чынам суд апраўдаў паліцэйскага з Базеля, які ў 2007 годзе на выставе гадзіннікаў і каштоўнасцяў затрымаў бежанца з Алжыра, бо западозрыў яго ў крадзяжы. Паліцэйскі апрануў на яго кайданкі і публічна выкарыстаў у яго адрас эпітэты, якія сталі пасля падставай для судовага разбіральніцтва.
Базельскі суд, які разглядаў гэтую справу першым, прызнаў паліцэйскага вінаватым у расізме і прысудзіў яго да штрафу. Аднак федэральны суд адмяніў гэты прысуд. На думку вышэйшай інстанцыі, абразы не мелі дачынення да этнічнай ці рэлігійнай прыналежнасці затрыманага.
Больш за тое, федэральны суд вырашыў, што выкарыстанне слоў «свіння» і «дзярмовы» нават у спалучэнні з назвай той ці іншай нацыянальнасці нельга лічыць праявай расізму, паколькі ў нямецкай мове гэтыя словы даўно і шырока выкарыстоўваюцца для грубага выразу звычайнай незадаволенасці.