Сёння ў Лошыцкай сядзібе адкрыецца музей
Рэканструкцыя помніка цягнулася з 2008 года.
Сучасны выгляд Лошыцкай сядзібы. Фота: Вераніка Малакова, minsknews.by.
Урачыстае адкрыццё Лошыцкай сядзібы адбудзецца сёння, 29 красавіка а 17:00, паведамілі «Нашай Ніве» супрацоўнікі музея.
У мінулым годзе завершылася рэстаўрацыя сядзібы, распачатая ў 2008 годзе, калі сядзіба была ў аварыйным стане. Падчас рэканструкцыі частка сядзібы была разабраная, затым як канструктар сабраная наноў.
Лошцыкая сядзіба — помнік архітэктуры XVIII—XIX стагоддзяў. Сучасны вышляд, як сцвярджае дырэктар музея, набліжаны да канца XIX стагоддзя, калі сядзіба належыла Яўстаху Любанскаму і была цэнтрам жыцця мінскай арыстакратыі.
Рэканструкцыя Лошыцкай сядзібы. Фота Алеся Пілецкага.
Лошыцкая сядзіба да рэканструкцыі. Фота: minchanin.esmasoft.com.
Яўстах Любанскі адрэстаўраваў сядзібу ў стылі рускага мадэрну, збудаваў двухпавярховы флігель, бровар на беразе ракі, карчму і каменны млын.
Музей у Лошыцкай сядзібе пазнаёміць з развіццём Лошыцы ад X стагоддзя да нашых дзён, у сядзібе мае адкрыцца выстава «Дух часу і раскошы» з калекцыі Ігара Сурмачэўскага, яна прадэманструе моду і стыль 1820-1920-х гадоў.
Музей будзе адкрыты з 11 да 19 гадзіны, выходныя — панядзелак і аўторак.