Эдуард Пальчыс — у СІЗА. Беларускі палітычны check-you
Піша Андрэй Дынько.
Трохі пра словы і справы.
Эдуард Пальчыс сядзіць у СІЗА за публікацыі ў блогу 1863x.com.
1863x.com быў сайтам рэзкім, па-юнацку гарачым, але без сумневу патрыятычным.
І гэта была бліскучая журналістыка, сябры. Нагадаю, што гэта 1863x.com вывеў на чыстую ваду правакатара Вячаслава Дзіянава, які спрабаваў выкарыстаць Маўклівыя пратэсты 2011-га.
І вось, беларускі хлопец Пальчыс сядзіць у турме. Яму шыюць распальванне нацыянальнай варожасці — гэта, у сутнасці, за рэзкую крытыку перадзелу межаў братняй Украіны. Яшчэ яму шыюць парнаграфію (тыповая метода) — гэта за перадрук калажа з сайта расійскіх шавіністаў, зроблены, каб паказаць гадкасць аўтараў падобных рэсурсаў.
Прыдумала гэтыя абвінавачванні ведамства міністра Шуневіча. Мы не ведаем, хто канкрэтна, але ёсць факт, што затрымлівалі юнака супрацоўнікі МУС. (Можа быць, з падказкі-кляўзы таго самага прышчучанага, але вынаходлівага авантурыста Дзіянава.) А ў Следчым камітэце ніхто не наважыўся запярэчыць МУС у справе, дзе пахне «паліцікай».
Пасля першага арышту і адпраўкі на судова-псіхічную экспертызу ў Навінкі (яшчэ адна тыповая метода) шакаваны юнак разам са сваёй маладой жонкай, якой таксама прыйшлося праз усё гэта прайсці, выехаў з краіны. Тады торжествующе дадалося абвінавачванне трэцяе — пра парушэнне падпіскі пра нявыезд.
У выніку 26-гадовы сутулы юнак-патрыёт Пальчыс трапіў у СІЗА на Валадарскага, дзе ў свой час сядзелі паўстанцы Каліноўскага і Якуб Колас. А адначасова тыя людзі, якія спяць і бачаць, каб дзяржаўнасць Беларусі была ліквідаваная, для якіх ліквідацыя Беларусі як нацыі — гэта мара жыцця, тыя людзі ў пікейных камізэльках штотыдзень вяшчаюць на ток-шоу тэлеканала АНТ, асаністыя, бы панамскія хамелеоны.
Гэта ўсё, што трэба ведаць пра расклад сілаў, кажучы словамі паэта, «на нашай — не сваёй зямлі». Людзі, будзьце пільныя.