Eduard Palčys — u SIZA. Biełaruski palityčny check-you
Piša Andrej Dyńko.
Trochi pra słovy i spravy.
Eduard Palčys siadzić u SIZA za publikacyi ŭ błohu 1863x.com.
1863x.com byŭ sajtam rezkim, pa-junacku haračym, ale biez sumnievu patryjatyčnym.
I heta była bliskučaja žurnalistyka, siabry. Nahadaju, što heta 1863x.com vyvieŭ na čystuju vadu pravakatara Viačasłava Dzijanava, jaki sprabavaŭ vykarystać Maŭklivyja pratesty 2011-ha.
I voś, biełaruski chłopiec Palčys siadzić u turmie. Jamu šyjuć raspalvańnie nacyjanalnaj varožaści — heta, u sutnaści, za rezkuju krytyku pieradziełu miežaŭ bratniaj Ukrainy. Jašče jamu šyjuć parnahrafiju (typovaja mietoda) — heta za pieradruk kałaža z sajta rasijskich šavinistaŭ, zrobleny, kab pakazać hadkaść aŭtaraŭ padobnych resursaŭ.
Prydumała hetyja abvinavačvańni viedamstva ministra Šunieviča. My nie viedajem, chto kankretna, ale jość fakt, što zatrymlivali junaka supracoŭniki MUS. (Moža być, z padkazki-klaŭzy taho samaha pryščučanaha, ale vynachodlivaha avanturysta Dzijanava.) A ŭ Śledčym kamitecie nichto nie navažyŭsia zapiarečyć MUS u spravie, dzie pachnie «palicikaj».
Paśla pieršaha aryštu i adpraŭki na sudova-psichičnuju ekśpiertyzu ŭ Navinki (jašče adna typovaja mietoda) šakavany junak razam sa svajoj maładoj žonkaj, jakoj taksama pryjšłosia praz usio heta prajści, vyjechaŭ z krainy. Tady toržiestvujuŝie dadałosia abvinavačvańnie treciaje — pra parušeńnie padpiski pra niavyjezd.
U vyniku 26-hadovy sutuły junak-patryjot Palčys trapiŭ u SIZA na Vaładarskaha, dzie ŭ svoj čas siadzieli paŭstancy Kalinoŭskaha i Jakub Kołas. A adnačasova tyja ludzi, jakija śpiać i bačać, kab dziaržaŭnaść Biełarusi była likvidavanaja, dla jakich likvidacyja Biełarusi jak nacyi — heta mara žyćcia, tyja ludzi ŭ pikiejnych kamizelkach štotydzień viaščajuć na tok-šou telekanała ANT, asanistyja, by panamskija chamieleony.
Heta ŭsio, što treba viedać pra raskład siłaŭ, kažučy słovami paeta, «na našaj — nie svajoj ziamli». Ludzi, budźcie pilnyja.