Украіна вызначыла сем мэтаў для ўступлення ў ЕС і НАТА
Кабмін Украіны вызначыў мэты, якія краіне неабходна дасягнуць на працягу найбліжэйшых пяці гадоў. Іх выкананне стане падмуркам для рэалізацыі курсу на атрыманне паўнапраўнага сяброўства ў ЕС і НАТА, гаворыцца ў праграме, якую ўрад унёс у Вярхоўную Раду, перадае РБК.
Да 2025 годзе ўлады Украіны хочуць выканаць наступныя мэты:
- Эканоміка краіны павінна вырасці на 40%
- Стварыць за 1 млн новых працоўных месцаў
- Прыцягнуць $50 млрд прамых замежных інвестыцый
- Прывесці ў добры стан усе асноўныя дарогі працягласцю 24 тыс. км, пабудаваць пяць глыбакаводных партоў і 15 аэрапортаў
- Забяспечыць кожнага ўкраінца на ўзроўні рэальнага пражытачнага мінімуму
- Знізіць узровень забруджвання навакольнага асяроддзя па меншай меры на 20%
- Дасягнуць станоўчага дэмаграфічнага трэнду
Ва ўрадзе Украіны адзначылі, што найбліжэйшыя пяць гадоў будуць складанымі для краіны з-за таго, што траціна бюджэту траціцца на вяртанне і абслугоўванне даўгоў, камунальная гаспадарка вядзецца неэфектыўна, чыгуначная і рачная інфраструктуры амаль цалкам зношаныя, амаль чвэрць насельніцтва жыве за мяжой беднасці, а таксама з-за слабой эканомікі і дзяржінстытутаў пры наяўнасці моцных манаполій і «нефармальных груп уплыву».
У Кабінеце міністраў нагадалі, што на сітуацыю таксама ўплывае ваенны канфлікт на Данбасе, страта кантролю над Крымам і «пагроза працягу агрэсіўных дзеянняў Расіі», аж да ваеннага ўварвання.