Ukraina vyznačyła siem metaŭ dla ŭstupleńnia ŭ ES i NATA
Kabmin Ukrainy vyznačyŭ mety, jakija krainie nieabchodna dasiahnuć na praciahu najbližejšych piaci hadoŭ. Ich vykanańnie stanie padmurkam dla realizacyi kursu na atrymańnie paŭnapraŭnaha siabroŭstva ŭ ES i NATA, havorycca ŭ prahramie, jakuju ŭrad unios u Viarchoŭnuju Radu, pieradaje RBK.
Da 2025 hodzie ŭłady Ukrainy chočuć vykanać nastupnyja mety:
- Ekanomika krainy pavinna vyraści na 40%
- Stvaryć za 1 młn novych pracoŭnych miescaŭ
- Pryciahnuć $50 młrd pramych zamiežnych inviestycyj
- Pryvieści ŭ dobry stan usie asnoŭnyja darohi praciahłaściu 24 tys. km, pabudavać piać hłybakavodnych partoŭ i 15 aeraportaŭ
- Zabiaśpiečyć kožnaha ŭkrainca na ŭzroŭni realnaha pražytačnaha minimumu
- Źnizić uzrovień zabrudžvańnia navakolnaha asiarodździa pa mienšaj miery na 20%
- Dasiahnuć stanoŭčaha demahrafičnaha trendu
Va ŭradzie Ukrainy adznačyli, što najbližejšyja piać hadoŭ buduć składanymi dla krainy z-za taho, što tracina biudžetu tracicca na viartańnie i absłuhoŭvańnie daŭhoŭ, kamunalnaja haspadarka viadziecca nieefiektyŭna, čyhunačnaja i račnaja infrastruktury amal całkam znošanyja, amal čverć nasielnictva žyvie za miažoj biednaści, a taksama z-za słaboj ekanomiki i dziaržinstytutaŭ pry najaŭnaści mocnych manapolij i «niefarmalnych hrup upłyvu».
U Kabiniecie ministraŭ nahadali, što na situacyju taksama ŭpłyvaje vajenny kanflikt na Danbasie, strata kantrolu nad Krymam i «pahroza praciahu ahresiŭnych dziejańniaŭ Rasii», až da vajennaha ŭvarvańnia.