Прэс-служба «Гарадзеі»: У Сазановіча дыягнаставалі двухбаковую пнеўманію, але ён не на ШВЛ
ФК «Гарадзея»
Прэс-служба «Гарадзеі» выступіла са зваротам у сувязі з інфармацыяй аб успышцы каранавіруса ў камандзе.
«У паўабаронцы Станіслава Сазановіча дыягнаставалі двухбаковую пнеўманію, ён не знаходзіцца і не знаходзіўся на штучнай вентыляцыі лёгкіх, праходзіць лячэнне ў бальніцы. На дадзены момант стан стабільна здавальняючы, тэмпературы няма.
Паўабаронца Сяргей Пушнякоў з пацверджаным COVID-19 знаходзіцца дома на самаізаляцыі, захворванне працякае без сімптомаў, стан добры.
Паўабаронца Андрэй Сарокін з высокай тэмпературай атрымлівае лячэнне ў хатніх умовах», — паведамляе прэс-служба клуба.
У аўторак гульцы, трэнерскі штаб і адміністрацыя «Гарадзеі» пройдуць экспрэс-тэст на COVID-19.
Раней паведамлялася, што ў трох гульцоў «Гарадзеі» знойдзены каранавірус, а паўабаронца Станіслаў Сазановіч знаходзіцца на ШВЛ.