Памерла настаўніца, якая адседзела за згвалтаванне вучня, а потым выйшла за яго замуж
Былая настаўніца з Сіэтла, якая адседзела ў турме за сэксуальную сувязь са школьнікам, памерла ад раку ва ўзросце 58 гадоў, піша bbc.com.
Гісторыя Мэры Кей Летурно шакавала ўвесь свет.
34-гадовая школьная настаўніца мела сэксуальную сувязь са сваім вучнем, якому тады было 12—13 гадоў.
Мэры Кей была замужам, мела чацвярых дзяцей, а Вілі Фуалаау вучыўся ў шостым класе. Аднак гэта не перашкодзіла — жанчына зацяжарала ад яго і нарадзіла дзіця.
У 1997 годзе яе прысудзілі да зняволення за згвалтаванне непаўналетняга.
Праз шэсць месяцаў Мэры Кэй датэрмінова вызвалілі, але яна працягвала сустракацца са сваім палюбоўнікам-падлеткам. За гэта яе зноў пасадзілі ў турму, на гэты раз на сем гадоў.
У зняволенні былая настаўніца нарадзіла другога дзіця ад свайго вучня.
Абедзве іх дачкі спачатку выхоўвала сям'я бацькі — Вілі Фуалаау.
У 2005 годзе Мэры Кей Летурно выйшла з турмы, і закаханыя пажаніліся. Але пасля 12 гадоў шлюбу разышліся.
Адвакат спадарыні Летурно паведаміў амерыканскім СМІ, што яна памерла дома. Побач былі яе дзеці, а таксама былы вучань і муж Вілі Фуалаау. Апошнія шэсць месяцаў жанчына хварэла.
Мэры Кей Летурно нарадзілася ў сям'і кансерватыўнага кангрэсмена-рэспубліканца Джона Г. Шмітца. Яе выхоўвалі ў каталіцкіх традыцыях. Аднак палітычная кар'ера яе бацькі скончылася скандалам, калі высветлілася, што ён меў двух дзяцей па-за шлюбам.
Фота на галоўнай старонцы: Shutterstock.