Цяжарная бежанка з лагера на мяжы страціла дзіця
Інфармацыю пацвердзіў начальнік Галоўнага ўпраўлення арганізацыі медыцынскай дапамогі Міністэрства аховы здароўя Аляксей Шчарбінскі.
Ён расказаў, што ў бальніцу Гродзенскай вобласці звярнулася цяжарная грамадзянка Ірака. «На жаль, нягледзячы на ўсе прынятыя дзеянні, спецыялістам не ўдалося выратаваць дзіця: была дыягнаставана гібель плода ва ўлонні. Сама жанчына знаходзіцца ў стабільным стане і атрымлівае ўсю неабходную дапамогу», — сказаў прадстаўнік ведамства.
Агулам, па інфармацыі Міністэрства аховы здароўя, за апошнія суткі 18 чалавек з лагера бежанцаў звярнуліся ў бальніцы і паліклінікі па медыцынскую дапамогу. Чацвёра былі шпіталізаваныя. Гэта пацыенты розных узростаў ад 10 да 70 гадоў. А яшчэ 14-ці была аказана амбулаторная дапамога. Акрамя таго, ужо было зроблена каля 20 выездаў брыгад хуткай дапамогі да месца лагера на мяжы.