Ciažarnaja biežanka z łahiera na miažy straciła dzicia
Infarmacyju paćvierdziŭ načalnik Hałoŭnaha ŭpraŭleńnia arhanizacyi miedycynskaj dapamohi Ministerstva achovy zdaroŭja Alaksiej Ščarbinski.
Jon raskazaŭ, što ŭ balnicu Hrodzienskaj vobłaści źviarnułasia ciažarnaja hramadzianka Iraka. «Na žal, niahledziačy na ŭsie pryniatyja dziejańni, śpiecyjalistam nie ŭdałosia vyratavać dzicia: była dyjahnastavana hibiel płoda va ŭłońni. Sama žančyna znachodzicca ŭ stabilnym stanie i atrymlivaje ŭsiu nieabchodnuju dapamohu», — skazaŭ pradstaŭnik viedamstva.
Ahułam, pa infarmacyi Ministerstva achovy zdaroŭja, za apošnija sutki 18 čałaviek z łahiera biežancaŭ źviarnulisia ŭ balnicy i palikliniki pa miedycynskuju dapamohu. Čaćviora byli špitalizavanyja. Heta pacyjenty roznych uzrostaŭ ad 10 da 70 hadoŭ. A jašče 14-ci była akazana ambułatornaja dapamoha. Akramia taho, užo było zroblena kala 20 vyjezdaŭ bryhad chutkaj dapamohi da miesca łahiera na miažy.