Расійскія ўлады збіраюцца экстрадзіраваць Яну Пінчук у Беларусь, дзе яе чакае вялікі тэрмін зняволення
Днямі Cмольнінскі раённы суд Санкт-Пецярбурга разгледзеў пазоў да мясцовага дэпартамента паліцыі, які адмовіў беларусцы Яне Пінчук у наданні часовага прытулку ў Расіі.
Дзяўчына прасіла прызнаць незаконным рашэнне ў адмове атрымання ёй такога статусу.
Суд яе довады не падтрымаў. Зараз будуць апеляцыі.
«Спачатку ў гарадскі суд, потым у апеляцыйны суд. І толькі калі абедзве інстанцыі пакінуць у сіле пастанову Генпракуратуры аб экстрадыцыі, Яну экстрадуюць» — сказала яе адвакат Марыя Бяляева.
Па словах адваката, пасяджэнне ў гарадскім судзе пачнецца 1 чэрвеня.
Дзяўчына знаходзіцца за кратамі ўжо 7 месяцаў. У Беларусі Яну абвінавачваюць паводле пяці артыкулаў Крымінальнага кодэкса за адміністраванне тэлеграм-чата «Віцебск 97%», прызнанага ўладамі экстрэмісцкім.
Ёй пагражае да 20 гадоў пазбаўлення волі.