Ціханоўская сустрэлася ў ПА АБСЕ з украінскай дэлегацыяй і дамовілася аб супрацоўніцтве
Пра сустрэчу Святланы Ціханоўскай з украінскай дэлегацыяй паведамляе «Позірк» са спасылкай на галоўнага дарадцу Ціханоўскай Франака Вячорку. Сустрэча адбылася ў рамках візіту беларускай дэмакратычнай лідаркі ў Вену на зімовую сесію Парламенцкай асамблеі АБСЕ.
«Ціханоўская распавяла, як беларусы, у тым ліку добраахвотнікі на фронце, дапамагаюць украінцам; выказала падтрымку і салідарнасць», — сказаў Вячорка.
Паводле яго слоў, бакі абмеркавалі варыянты «сумесных дзеянняў на міжнароднай арэне, каб спыніць агрэсію Пуціна і Лукашэнкі, закранулі праблему антыўкраінскай прапаганды».
Украінскую дэлегацыю ўзначальвае старшыня камітэта па пытаннях гуманітарнай і інфармацыйнай палітыкі Вярхоўнай Рады Мікіта Патураеў. Ён быў паліттэхнолагам будучага прэзідэнта Уладзіміра Зяленскага, уваходзіць у фракцыю кіруючай партыі «Слуга народа».