Спецпасланнік Трампа пацвердзіў, што на наступным тыдні адбудуцца перамовы Украіны і ЗША
Спецпасланнік Трампа Стыў Уіткаф пацвердзіў, што на наступным тыдні ў Саудаўскай Аравіі адбудуцца перамовы паміж дэлегацыямі Украіны і ЗША па расійска-ўкраінскай вайне, піша Sky News.
Стыў Уіткаф. Фота: Anna Moneymaker / Getty Images
Па яго словах, горад у Саудаўскай Аравіі, дзе адбудзецца сустрэча, пакуль дакладна не вызначаны.
Спецпасланнік прывітаў сігнал Зяленскага да Трампа і сказаў, што гэта «станоўчы першы крок».
Вашынгтон будзе спрабаваць узгадніць рамкі мірнага пагаднення і пачатковага спынення агню для Украіны, дадаў Уіткаф.
Украінскі чыноўнік на ўмовах ананімнасці расказаў агенцтву AFP, што кіраўнік Адміністрацыі Зяленскага Андрэй Ярмак узначаліць украінскую дэлегацыю, у якую таксама можа ўвайсці міністр абароны Рустэм Умераў, піша «Еўрапейская праўда».
Выданне Axios паведамляла, што сустрэча адбудзецца ў сераду 12 сакавіка.
Пасля спрэчкі Трампа, Вэнса і Зяленскага ў Белым доме 28 лютага ўкраінская і амерыканская дэлегацыі не падпісалі чаканае пагадненне аб выкапнях. Амерыканскі бок тады заявіў пра спыненне вайсковай дапамогі і перадачу разведзвестак для Украіны.
4 сакавіка Зяленскі звярнуўся да ЗША і сказаў, што для міру ва Украіне гатовы разам з камандай працаваць пад лідарствам Трампа. 6 сакавіка ён дадаў, што «Украіна аднавіла працу з ЗША».
Чытайце таксама:
Вэнс назваў умовы аднаўлення вайсковай дапамогі Украіне
Дзяржсакратар Рубіа: Спыненне вайны ва Украіне запатрабуе саступак з абодвух бакоў