Былы чыноўнік з Бабруйска пайшоў на вайну за Расію. Паміж кантрактам і смерцю прайшло 20 дзён
Новы 2025 год Вадзім Наўгародскі сустрэў на фронце. А праз тры дні загінуў.
У спісе беларусаў, якія ваююць на баку Расіі ва Украіне, апублікаваным праектам «Хачу жыць», ёсць некалькі асоб, якія не пратрымаліся ў баях і месяц з часу падпісання кантракта.
Адзін з антырэкардсменаў — бабруйчанін Вадзім Наўгародскі. Ён падпісаў кантракт 14 снежня 2024 года, а 4 студзеня 2025 года ўжо загінуў.
Вадзім Наўгародскі. Фота з базы «Белпола»
Па інфармацыі BelPol, мужчына працаваў у сферы адукацыі, у прыватнасці, у профільным аддзеле адміністрацыі Ленінскага раёна ў Бабруйску, а таксама ў Бабруйскай дапаможнай школе.
Відаць, кар’ера чыноўніка скончылася з атрыманнем судзімасці: падобна, што паралельна мужчына займаўся прадпрымальніцкай дзейнасцю, але незаконна, за што і быў прыцягнуты ў 1997 годзе да адказнасці па 151 артыкуле КК (у тыя гады — парушэнне парадку ажыццяўлення прадпрымальніцкай дзейнасці).
Вядома, што потым Вадзім Наўгародскі працаваў у якасці сталяра-станочніка. Апошнім часам жыў у Расіі і атрымаў грамадзянства Расіі.