Выдалены тэлеграм-канал школьнікаў, якія выступалі супраць пакістанскіх мігрантаў, прызналі «экстрэмісцкім»
На сайце Міністэрства інфармацыі ў абноўленым Рэспубліканскім спісе экстрэмісцкіх матэрыялаў з'явіліся сярод іншага тэлеграм-канал, чаты і боты суполкі «Молодёжное движение ДоЛГБ». Яна была створаная пасля таго, як з'явілася інфармацыя пра намер Лукашэнкі завезці ў Беларусь 150 000 мігрантаў.
Па інфармацыі «Нашай Нівы», стваральнікі гэтай суполкі — звычайныя школьнікі. Яны лічаць сябе патрыётамі Беларусі, але падкрэсліваюць, што з'яўляюцца апалітычнымі. Да падзей 2020 года яны ставяцца, хутчэй, абыякава, але гэтаму ёсць простае тлумачэнне — на момант гарачага супрацьстаяння грамадства і сілавікоў яны вучыліся яшчэ ў пачатковай школе і зусім не цікавіліся палітыкай.
Неўзабаве пасля таго, як суполка стала набываць вядомасць і прыцягваць да сябе пільную ўвагу з боку грамадства і сілавікоў, заснавальнікі самі яе выдалілі, відаць, усвядоміўшы небяспеку. Але гэта не ўратавала ад прызнання іх дзейнасці «экстрэмісцкай».
Акрамя таго, «экстрэмісцкі» спіс гэтым разам папоўнілі:
- ютуб-каналы BRUTTO NOSTRA, «Кабинет Никитенко», Novaja Ziamlia;
- тыкток-старонка zloybelevrey;
- старонка ў інстаграме krok.kult;
- суполка ва «Укантакце» «Вольная Беларусь»;
- тэлеграм-каналы, чаты і боты «Молодёжное движение ДоЛГБ», «Долгонутый чат», «Минск», «Должностная анкета», «Долгонутые предложения»;
- сайт і старонкі ў сацсетках праекта BY teatr.