У большасці абласных гарадоў 9 мая правядуць «Бессмяротны полк»

Паводле планаў, выкладзеных прарасійскімі актывістамі, асобныя шэсці «Бессмяротнага палка» збіраюцца правесці прынамсі ў Брэсце, Віцебску, Гомелі і Гродне.

Здымак ілюстрацыйны. Фота: Пасольства Расіі ў Беларусі

Прарасійскія актывісты апублікавалі месцы збору ўдзельнікаў у Мінску і іншых абласных гарадах Беларусі. Усюды на іх будуць без абмежаванняў раздавацца георгіеўскія стужкі, якія за апошняе дзесяцігоддзе сталі галоўным сімвалам расійскага рэваншызму і мілітарызму.

Адкрыта пад банерамі «Бессмяротны полк» аматары Расіі будуць збірацца ў Брэсце, Віцебску і Гродне, у Гомелі банер будзе называцца «Памятаем подзвіг савецкага народа-пераможцы».

У Мінску Каардынацыйная рада арганізацый расійскіх суайчыннікаў зранку арганізуе асобнае ўскладанне кветак, а вечарам збіраецца далучыцца да гледачоў вайсковага параду.

Толькі ў Магілёве прарасійскія актывісты, як выглядае, не плануюць нічога асобнага, а толькі далучацца да звычайнай арганізаванай уладамі калоны «Беларусь памятае». 

Пры гэтым у апісанні сваёй акцыі яны тлумачаць, што «Беларусь памятае» і «Бессмяротны полк», як таксама георгіеўская і чырвона-зялёная стужкі — гэта «адна агульная Перамога і адна агульная памяць пра герояў Вялікай Айчыннай вайны. Рэспубліка Беларусь і Расійская Федэрацыя адзіныя ў сваёй ацэнцы 80-годдзя Перамогі».

Каментары да артыкула