Зяленскі сустрэўся з віцэ-прэзідэнтам ЗША і Папам у Ватыкане
Сёння ў Ватыкане прайшла інтранізацыя (уступленне на пасаду) Папы Льва XIV, на якой прысутнічалі многія высокапастаўленыя палітыкі.
Уладзімір Зяленскі паціскае руку Джэй Дзі Вэнсу ў Ватыкане. Фота: AP Photo/Gregorio Borgi
Пасля святой службы прэзідэнт Украіны Уладзімір Зяленскі сустрэўся з новаабраным Папам.
Зяленскі з Папам Львом XIV. Фота: тэлеграм-канал Зяленскага
Вядома таксама пра яго сустрэчу з віцэ-прэзідэнтам ЗША Джэй Дзі Вэнсам і дзяржсакратаром Марка Рубіа. Пра гэта паведамляюць украінскія СМІ. Сустрэча працягвалася 40 хвілін, піша «Суспільне».
Пазней Зяленскі назваў сустрэчу «добрай».
«Абмеркавалі перамовы ў Стамбуле, куды расейцы накіравалі дэлегацыю нізкага ўзроўню, якая не мела паўнамоцтваў прымаць пастановы. Я пацвердзіў гатоўнасць Украіны да сапраўднай дыпламатыі і адзначыў важнасць хутчэйшага поўнага і безумоўнага спынення агню.
Таксама закранулі пытанне неабходнасці санкцый супраць Расіі, двухбаковага гандлю, абароннага супрацоўніцтва, сітуацыі на полі бою і будучага абмену палоннымі. Ціск на Расію павінен працягвацца, пакуль яна не будзе гатовая спыніць вайну. І, вядома, мы абмеркавалі нашы агульныя крокі для дасягнення справядлівага і ўстойлівага міру», — напісаў у тэлеграм-канале Зяленскі.
Апошні раз з Вэнсам Зяленскі сустракаліся ў Белым доме ў лютым. Размова з ім і Трампам тады скончылася спрэчкай адносна вайны ва Украіне і дапамогі ЗША (Вэнс папракаў Зяленскага, што яны няўдзячныя).