«Я падумаў: напэўна, хутка тое самае будзе са мной». Ціханоўскі расказаў, што змянілася ў яго ўтрыманні пасля смерці Навальнага

Вызвалены з дапамогаю ЗША беларускі апазіцыянер Сяргей Ціханоўскі распавёў Associated Press новыя падрабязнасці пра свае 5 гадоў зняволення.

Сяргей Ціханоўскі на першай прэс-канферэнцыі пасля вызвалення, Вільня, 22 чэрвеня 2025 года

Ціханоўскі сказаў, што за гады ў адзіночнай камеры ён «амаль забыўся, як гаварыць». Яго трымалі ў поўнай ізаляцыі, адмаўлялі ў медыцынскай дапамозе і ледзь давалі ежы.

— Калі б вы бачылі: мне на талерку кідалі ўсяго дзве лыжкі кашы — дзве маленькія лыжкі. Часам мне давалі маленькі цюбік зубной пасты, кавалачак мыла — як падачку. Часам давалі, часам — не, — расказаў блогер, дадаўшы, што не мог нічога купіць у турэмнай краме.

«Гэта безумоўна катаванні», — сказаў Ціханоўскі.

«Супрацоўнікі турмы ўвесь час казалі мне: «Ты будзеш тут не толькі тыя 20 гадоў, якія мы ўжо табе далі. Мы асудзім цябе зноў. Ты ніколі не выйдзеш. Ты памрэш тут», — паўтаралі яны зноў і зноў».

Ціханоўскі распавёў, што ўмовы крыху палепшыліся пасля смерці расійскага апазіцыянера Аляксея Навальнага ў калоніі ў лютым 2024 года.

«Калі памёр Аляксей Навальны, я падумаў: напэўна, хутка тое самае будзе са мной… І тады нешта змянілася. Было відавочна, што нехта наверсе сказаў: «Зрабіце так, каб ён тут не памёр. Нам не патрэбны такія праблемы». Стала трошкі мякчэй… У нейкі момант прыйшло распараджэнне: Ціханоўскага трэба пакінуць жывым, не забіваць».

Каментары да артыкула