Паўночны карэец абвязаўся пенапластам і морам уцёк уплаў. Плыў 10 гадзін
Незвычайны выпадак адбыўся пры канцы ліпеня.
Памежныя пасты Паўночнай (уверсе справа) і Паўднёвай (унізе) Карэі. Ваколіцы горада Паджу, Паўднёвая Карэя. 4 жніўня 2025 года. Фота: AP Photo / Ahn Young-joon
Пра незвычайны выпадак, які адбыўся ў канцы ліпеня, паведамляе The Wall Street Journal са спасылкай на ўлады Паўднёвай Карэі.
Жыхар Паўночнай Карэі, імя якога пакуль не паведамляецца, здолеў трапіць у Паўднёвую Карэю арыгінальным і рызыкоўным спосабам.
Ён абвязаўся пенапластам для плывучасці і такім чынам 10 гадзін плыў уздоўж заходняга ўзбярэжжа паўвострава, незаўважна для пагранічнікаў, якім загадана страляць па кожным, хто спрабуе ўцячы з краіны.
Мужчына быў заўважаны паўднёвакарэйскімі вайскоўцамі прыкладна за 1,5 кіламетра на поўдзень ад мяжы з Паўночнай Карэяй позна ўвечары 30 ліпеня. Паведамляецца, што ўцякач размахваў рукамі і паказваў: я да вас.
Гэты выпадак — вялікая рэдкасць. Раней штогод у Паўднёвую Карэю трапляла больш за 1000 паўночных карэйцаў, але падчас пандэміі колькасць рэзка скарацілася. У 2024 годзе на поўдзень здолелі перабрацца толькі 236 чалавек. Гэта стала вынікам жорсткага перакрыцця межаў рэжымам Кіма.
Большасць уцекачоў раней пераходзілі мяжу з Кітаем, дзе працавалі сеткі пасярэднікаў. Пасля распараджэнняў Кім Чэн Ына ўмацаваць мяжу і ўзмацніць кантроль магчымасці для ўцёкаў звяліся да некалькіх небяспечных сцэнарыяў — праз дэмілітарызаваную зону, якая моцна ахоўваецца, на малых рыбацкіх лодках або ўплаў, як у гэтым выпадку.
Паведамляецца, што ў гэтым выпадку жыхар Паўночнай Карэі змог перасячы мяжу ў вусці ракі на захадзе паўвострава.
Акурат у гэтай самай мясцовасці летась адбыўся іншы такі выпадак, калі іншы паўночны карэец змог прабрацца на поўдзень. А літаральна некалькі дзён таму, у тым жа раёне, быў знойдзены труп 36-гадовага паўночнакарэйскага селяніна, якога Пхеньян адрокся.
Такія гісторыі сведчаць, што нават ва ўмовах жорсткага кантролю над межамі людзі працягваюць прабірацца на свабоду, нават рызыкуючы жыццём.
Чытайце таксама:
Паўночная Карэя зарабіла на канфлікце ва Украіне $20 мільярдаў
Паўднёвая Карэя разбірае на мяжы гучнамоўнікі, скіраваныя на КНДР
Паўднёвакарэйская разведка: Кім Чэн Ын гадуе з 10-гадовай дачкі пераемніцу