Paŭnočny karejec abviazaŭsia pienapłastam i moram uciok upłaŭ. Płyŭ 10 hadzin

Niezvyčajny vypadak adbyŭsia pry kancy lipienia.

Pamiežnyja pasty Paŭnočnaj (uviersie sprava) i Paŭdniovaj (unizie) Karei. Vakolicy horada Padžu, Paŭdniovaja Kareja. 4 žniŭnia 2025 hoda. Fota: AP Photo / Ahn Young-joon

Pra niezvyčajny vypadak, jaki adbyŭsia ŭ kancy lipienia, paviedamlaje The Wall Street Journal sa spasyłkaj na ŭłady Paŭdniovaj Karei.

Žychar Paŭnočnaj Karei, imia jakoha pakul nie paviedamlajecca, zdoleŭ trapić u Paŭdniovuju Kareju aryhinalnym i ryzykoŭnym sposabam.

Jon abviazaŭsia pienapłastam dla płyvučaści i takim čynam 10 hadzin płyŭ uzdoŭž zachodniaha ŭźbiarežža paŭvostrava, niezaŭvažna dla pahraničnikaŭ, jakim zahadana stralać pa kožnym, chto sprabuje ŭciačy z krainy.

Mužčyna byŭ zaŭvažany paŭdniovakarejskimi vajskoŭcami prykładna za 1,5 kiłamietra na poŭdzień ad miažy z Paŭnočnaj Karejaj pozna ŭviečary 30 lipienia. Paviedamlajecca, što ŭciakač razmachvaŭ rukami i pakazvaŭ: ja da vas.

Hety vypadak — vialikaja redkaść. Raniej štohod u Paŭdniovuju Kareju traplała bolš za 1000 paŭnočnych karejcaŭ, ale padčas pandemii kolkaść rezka skaraciłasia. U 2024 hodzie na poŭdzień zdoleli pierabracca tolki 236 čałaviek. Heta stała vynikam žorstkaha pierakryćcia miežaŭ režymam Kima.

Bolšaść uciekačoŭ raniej pierachodzili miažu z Kitajem, dzie pracavali sietki pasiarednikaŭ. Paśla rasparadžeńniaŭ Kim Čen Yna ŭmacavać miažu i ŭzmacnić kantrol mahčymaści dla ŭciokaŭ źvialisia da niekalkich niebiaśpiečnych scenaryjaŭ — praz demilitaryzavanuju zonu, jakaja mocna achoŭvajecca, na małych rybackich łodkach abo ŭpłaŭ, jak u hetym vypadku.

Paviedamlajecca, što ŭ hetym vypadku žychar Paŭnočnaj Karei zmoh pierasiačy miažu ŭ vuści raki na zachadzie paŭvostrava.

Akurat u hetaj samaj miascovaści letaś adbyŭsia inšy taki vypadak, kali inšy paŭnočny karejec zmoh prabracca na poŭdzień. A litaralna niekalki dzion tamu, u tym ža rajonie, byŭ znojdzieny trup 36-hadovaha paŭnočnakarejskaha sielanina, jakoha Pchieńjan adroksia.

Takija historyi śviedčać, što navat va ŭmovach žorstkaha kantrolu nad miežami ludzi praciahvajuć prabiracca na svabodu, navat ryzykujučy žyćciom.

Kamientary da artykuła