Перад сустрэчай з Трампам Зяленскі пракансультаваўся з еўрапейскімі лідарамі

Прэзідэнт Украіны Уладзімір Зяленскі паведаміў, што перад сустрэчай з Дональдам Трампам у Вашынгтоне абмяркоўваў сітуацыю з шэрагам еўрапейскіх лідараў. Паводле яго слоў, мэта гэтых кансультацый — узгадніць пазіцыі наконт міру і бяспекі, піша «Еўрапейская праўда».

Уладзімір Зяленскі. Фота: Ebrahim Noroozi / AP

Зяленскі падкрэсліў, што галоўная задача цяпер — дамагчыся трывалага і надзейнага міру не толькі для Украіны, але і для ўсёй Еўропы. Ён адзначыў, што ад Пуціна нельга чакаць спынення агрэсіі па добрай волі, таму неабходны сумесны і настойлівы ціск з боку ЗША, Еўропы і ўсіх дзяржаў, якія паважаюць міжнародны парадак.

У сустрэчы з украінскім прэзідэнтам у Вашынгтоне ўдзельнічалі кіраўнікі Фінляндыі, Вялікабрытаніі, Італіі, прэзідэнтка Еўракамісіі і генеральны сакратар НАТА. Яны ўзгаднілі пазіцыі перад размовай Зяленскага з Трампам, якая прызначаная на той жа дзень.

Украінскі лідар падкрэсліў, што краіна гатовая да сапраўднага перамір’я і стварэння новай сістэмы бяспекі. «Украіне патрэбен мір», — падсумаваў ён.

Таксама раней у гэты самы дзень Зяленскі сустрэўся ў Вашынгтоне са спецпрадстаўніком Трампа Кітам Келагам.

Вядома, што на перамовах з амерыканскага боку будуць пяць чалавек разам з Трампам, а з украінскага — двое высокапастаўленых чыноўнікаў разам з прэзідэнтам.

Каментары да артыкула