У Гродне затрымалі маладую пару на інвалідных вазках. Высветлілася, што яны здаровыя
Маладыя людзі вырашылі трохі падзарабіць на міласціне.
Скрыншот відэа гродзенскай міліцыі
У Гродне сілавікі затрымалі маладую пару на інвалідных вазках. 22-гадовая дзяўчына і 25-гадовы хлопец з'яўляліся ў розных месцах горада і прасілі міласціну.
Чаму міліцыянеры вырашылі іх праверыць, невядома. Але высветлілася, што маладыя людзі цалкам здаровыя, і вазкі ім не патрэбныя. Інваліднасці ў іх няма.
Пара проста вырашыла падпрацаваць. Маладыя людзі прыехалі з Віцебска ў Гродна, мяркуючы, што ў новым горадзе іх ніхто не ведае і мінакі нічога не западозраць.
Дзяўчына расказала, што грошай сям'і не хапала. На працу яе не бралі, таму што няма адукацыі. Муж перыядычна падпрацоўваў паездкамі на заробкі ў Маскву. Маладыя людзі планавалі падзарабіць крыху грошай і вярнуцца ў Віцебск. Колькі пара паспела зарабіць, невядома. Але дзяўчына казала, што людзі да іх падыходзілі і ахвяравалі.
Цяпер сілавікі вырашаюць, як жыхароў Віцебска пакараць.