Беларускі біскуп запрасіў Папу наведаць Беларусь
Дапаможны біскуп Пінскай дыяцэзіі Андрэй Зноска на сваёй старонцы ў сацыяльных сетках паведаміў пра кароткую сустрэчу з Папам Львом XIV 1 кастрычніка падчас Генеральнай аўдыенцыі на плошчы Святога Пятра ў Ватыкане, піша Katolik.life.
Папа Леў XIV і біскуп Андрэй Зноска падчас аўдыенцыі ў Ватыкане. Скрыншот з відэа
Падчас аўдыенцыі біскупы, якія бралі ў ёй удзел, па чарзе падыходзілі да пантыфіка, каб павіншаваць яго і абмеркаваць важныя пытанні.
Размова Зноскі з Папам доўжылася ўсяго каля 15 секунд, за якія ён паспеў сказаць:
«Наша Царква марыць і моліцца, каб ваш візіт у нашу краіну стаў магчымым. Мы ўсе стомленыя вайной паміж нашымі суседзямі, а ваш прыезд у Беларусь будзе знакам міру і надзеі».
Біскуп падкрэсліў, што візіт пантыфіка мог бы стаць знакам адзінства, духоўнай падтрымкі і надзеі для беларускага народа, асабліва ва ўмовах сучасных геапалітычных і сацыяльных выклікаў.
У той жа час біскуп Віцебскі Алег Буткевіч, які таксама паехаў у Рым з паломнікамі са сваёй дыяцэзіі, на аўдыенцыю з Папам не трапіў, бо знаходзіўся разам са сваёй групай вернікаў, а не сярод біскупаў, якія падыходзілі да пантыфіка.
Чытайце таксама:
Нунцыю і віцебскаму біскупу не дазволілі сустрэцца са зняволенымі каталіцкімі святарамі
Афіцыйныя каталіцкія СМІ выразалі антываенную фразу ў гаміліі біскупа