Пасля рэпрэсій супраць рэдактараў беларускія раздзелы Вікіпедыі б'юць антырэкорды

Пасля затрыманняў і ціску на беларускіх вікіпедыстаў абодва беларускамоўныя раздзелы Вікіпедыі фіксуюць рэкордна нізкія тэмпы росту.

Футболка з вікі-прынтом. Фота: Wikimedia Commons

Статыстыкай падзяліўся адміністратар беларускай Вікіпедыі Уладзіслаў Чаховіч.

Антырэкорд у беларускай Вікіпедыі быў зафіксаваны  ў ліпені — за месяц быў створаны толькі 361 новы артыкул. У верасні паказчык крыху падрос да 569, але гэта ўсё адно істотна ніжэй за раней звыклыя 900—1100 артыкулаў на месяц. Адміністратар адзначае, што стабільнасць скончылася ў маі — адразу пасля пачатку пераследу вікіпедыстаў.

Колькасць артыкулаў, створаных у Беларускай Вікіпедыі за месяц. Фота: фэйсбук Уладзіслава Чаховіча 

«Думаю, не столькі фізічнае закрыццё рэдактараў паўплывала, як неразуменне тымі, хто знаходзіцца ў Беларусі, прэтэнзій да вікі і правіл гульні (іх і няма). Лепш быць асцярожным, чым прадуктыўным», — адзначае ён.

Яшчэ больш адчувальны спад актыўнасці ў раздзеле Вікіпедыі «тарашкевіцай»: у верасні раздзел не ўзяў нават псіхалагічную планку ў сто артыкулаў — створана ўсяго 99. Гэта найгоршы паказчык з 2016 года.

Колькасць правак, зробленых рэдактарамі Беларускай Вікіпедыі за месяц. Фота: фэйсбук Уладзіслава Чаховіча 

Увесну адбыліся затрыманні прынамсі трох адміністратараў беларускамоўных раздзелаў Вікіпедыі па крымінальных справах. Затрыманні суправаджаліся прапагандысцкімі матэрыяламі, у якіх энцыклапедыю называлі «зброяй масавага паражэння», а беларускія раздзелы — «кіраванымі з-за мяжы». 

Вікі-супольнасць не была паралізаваная, але статыстыка красамоўная: страх і няпэўнасць нанеслі цяжкі ўдар па адной з галоўных крыніц ведаў, напісаных па-беларуску.

Каментары да артыкула