Перад сустрэчай з Зяленскім Трамп звязаўся па тэлефоне з Пуціным
Напярэдадні сустрэчы з прэзідэнтам Украіны Уладзімірам Зяленскім прэзідэнт ЗША Дональд Трамп правёў тэлефонную размову з расійскім лідарам Уладзімірам Пуціным. Пра гэта сам Трамп паведаміў у сваёй сацыяльнай сетцы Truth Social, абяцаючы пазней расказаць больш падрабязна.
Уладзімір Пуцін і Дональд Трамп падчас сустрэчы на Алясцы 15 жніўня. Фота: Andrew Harnik/Getty Images
«Я цяпер размаўляю з прэзідэнтам Пуціным. Размова працягваецца, яна будзе працяглай, і я, як і прэзідэнт Пуцін, раскажу пра яе змест пасля яе заканчэння», — напісаў Трамп у сацсетцы Truth Social 16 кастрычніка.
Як паведамляла раней выданне Axios са спасылкай на крыніцы, Трамп збіраўся абмяркоўваць з Пуціным вайну ва Украіне.
Гэтая размова была першай за амаль два месяцы, ад часу папярэдняга непасрэднага кантакту Трампа з Пуціным прайшло 59 дзён.
Размова адбылася за дзень да таго, як Трамп будзе прымаць у Белым доме Уладзіміра Зяленскага. На сустрэчы амерыканскі і ўкраінскі прэзідэнты плануюць абмеркаваць магчымасць пастаўкі Украіне дальнабойных ракет «Тамагаўк».
Сам Трамп сказаў журналістам, што размова з Зяленскім будзе пра вайну і пра намер Украіны пачаць наступальныя дзеянні. Ён адзначыў, што будзе прымаць рашэнне па гэтым пытанні, але ўкраінскі бок хоча перайсці ў наступленне, і ЗША павінны будуць рэагаваць адпаведна.
Чытайце таксама:
Трамп: Турцыя можа дапамагчы скончыць вайну ва Украіне
Трамп прапануе фінансаваць перамогу Украіны за кошт Кітая
Трамп паіранізаваў з Пуціна, расказаўшы пра сустрэчу Уіткафа з ім