Вялікі нумар у гатэлі каля акіяна ў элітным раёне Рыа-дэ-Жанэйра. Як жыве Карпушонак, якая не дае пра сябе забыць
Вольга Карпушонак запісала новае відэа, каб паказаць, што яна не ў Беларусі. Мы вызначылі, дзе цяпер жыве былая дэлегатка Каардынацыйнай рады.
Раён Бара-да-Тыжука лічыцца адным з самых заможных і бяспечных у Рыа-дэ-Жанэйра. Фота: Wikimedia Commons
Два месяцы таму, у пачатку верасня, калі пасля абвінавачанняў у адрас Паўла Латушкі Вольга Карпушонак некалькі дзён не выходзіла на сувязь, па яе відэа ў тэлеграме ўдалося высветліць, што яна знаходзіцца на знакамітым пляжы Капакабана ў Рыа-дэ-Жанэйра.
Цяпер у кадры — акіян, але з іншага ракурсу: від з балкона шматпавярховага будынка. Візуальных падказак было няшмат, аднак пазнаць месца дапамаглі характэрны ўзор пліткі на тратуары і сеткавыя карабы для кандыцыянераў на фасадзе будынка.
Як высветлілася, Карпушонак спынілася ў апарт-гатэлі на ўзбярэжжы ў раёне Бара-да-Тыжука. Гэта адзін з самых сучасных і заможных раёнаў Рыа-дэ-Жанэйра. Ён вядомы самым доўгім пляжам у горадзе (каля 18 км), мадэрнісцкай архітэктурай, вялікімі жылымі комплексамі і высокім узроўнем бяспекі. Тут размяшчаюцца гандлёвыя цэнтры, універсітэты, офісы, а таксама асноўныя аб’екты Алімпіяды 2016 года. Атмасфера Бары спалучае камфорт заможнага прыгарада з курортным ладам жыцця — гэта своеасаблівы «бразільскі Маямі».
Краявід на акіян і лагуну, які адкрываецца з нумара Вольгі Карпушонак. Фота: Google
Апарт-гатэль, у якім спынілася Карпушонак, стаіць на першай лініі акіянічнага ўзбярэжжа. Фота: Booking
Сам апарт-гатэль (яго назву мы свядома не называем) узведзены ў 2000 годзе. Апарт-гатэлі адрозніваюцца ад звычайных тым, што прапануюць нумары, прыдатныя для доўгатэрміновага пражывання, бо яны абсталяваныя ўсім неабходным — фактычна гэта невялікія кватэры з усімі выгодамі.
У гэтым гатэлі нумары маюць кухню з плітой, духоўкай і халадзільнікам, а таксама пральную машыну ў ванным пакоі.
Планіроўка нумароў у апарт-гатэлі, у якім спынілася Вольга Карпушонак. Фота: 123i.com.br
Нумар плошчай каля 50—60 м² каштуе ў сярэднім 190—200 даляраў за ноч. Ён складаецца з гасцінай каля 20 м², да якой прымыкае невялікая кухня-ніша, спальні плошчай каля 15 м² і ваннага пакоя з душам. З гасцінай і спальні праз вялікія рассоўныя вокны можна выйсці на прасторны балкон, з якога адкрываецца краявід на Атлантычны акіян, пляж і лагуну Марапенды з гарамі на гарызонце.
Прыклад гасцінай у нумарах апарт-гатэля. Фота: Google
Прыклад кухні-нішы ў нумарах апарт-гатэля. Фота: Google
Прыклад спальняў у нумарах апарт-гатэля
Балкон з відам на акіян у нумары апарт-гатэля. Фота: Google
Для гасцей прадугледжаны бясплатная прыватная паркоўка, саўна і адкрыты басейн з відам на мора. Да пляжу — літаральна некалькі дзясяткаў метраў: трэба толькі перайсці авеню Лусіу Коста, якое цягнецца ўздоўж усяго ўзбярэжжа.
Адкрыты басейн у апарт-гатэлі з відам на акіян. Фота: Google
Па водгуках у Google, гатэль мае ацэнку 4,6 зоркі. Госці хваляць яго размяшчэнне, краявіды і камфорт, але сустракаюцца і крытычныя водгукі: будынку патрэбны рамонт, бо ён выглядае занядбаным, акрамя абноўленай зоны рэсэпшна. Скардзяцца таксама на павольныя ліфты, працечкі ў гульнявой зоне і «імправізаваны душ» у басейне.