У Барысаўскім раёне заўважылі сляды мядзведзя-бадзягі
Леснікі Іканскага лясніцтва ў Барысаўскім раёне заўважылі сляды двухгадовага мядзведзя на свежым снезе, піша «Мінская праўда».
Фота: Барысаўскі вопытны лясгас
Такіх жывёл называюць «бадзягамі» — гэта мядзведзі, якія выйшлі з зімовага сну заўчасна. У такім стане яны могуць быць больш небяспечныя, чым звычайна. Прычынай таго, што ім не спіцца, можа быць цёплы пачатак зімы, адсутнасць снегу ці недахоп корму восенню — неўраджай ягад, арэхаў і жалудоў.
Фота: Барысаўскі вопытны лясгас
Леснікі рэкамендуюць быць асцярожнымі тым, хто плануе шпацыры па лясах на Барысаўшчыне: пазбягаць глухіх участкаў лесу, асабліва з бураломамі і заваленымі ельнікамі — менавіта такія месцы мядзведзі выбіраюць для зімоўкі.
Для бяспекі таксама трэба:
- паводзіць сябе шумна — гаварыць, стукаць па дрэвах, каб жывёлы вас абміналі;
- рухацца павольна і не паварочвацца да мядзведзя спінай, не глядзець яму ў вочы;
- калі ідзяце з сабакам — трымайце яго на шворцы, каб не справакаваць жывёліну;
- калі знайшлі мядзведжую бярлогу або сляды — акуратна адступайце і паведамляйце ў лясніцтва або МНС.
Калі сустрэча з мядзведзем непазбежная, спецыялісты рэкамендуюць адступаць павольна, гаварыць спакойным нізкім голасам і не рабіць рэзкіх рухаў.
Чытайце таксама:
Складзены рэйтынг манагамнасці млекакормячых. На якім месцы чалавек?
Жыхара Віцебска за незаконнае паляванне на мядзведзя аштрафавалі на гіганцкую суму
«Дачка падумала, што гэта аўчарка». Што вядома пра мядзведзяня, якое шастала раніцай па Віцебску