З 1 ліпеня адмяняюць бясплатны праезд для студэнтаў у Мінску
У Мінску бясплатны праезд у грамадскім транспарце для студэнтаў плануецца адмяніць з 1 ліпеня. Як паведамілі БелаПАН упрэс-службе Мінгарвыканкама, такое рашэнне прынята 25 красавіка на сесіі Мінгарсавета.
Адмена льготы не распаўсюджваецца на навучэнцаў агульнаадукацыйных школ горада. Праект рашэння сесіі Мінгарвыканкама падлягае рэгістрацыі ў Міністэрстве юстыцыі.
Як заяўляў раней старшыня Мінгарвыканкама Мікалай Ладуцька, магчыма, у жніўні будзе разгледжана пытанне аб вяртанні бясплатнага праезду для студэнтаў з верасня гэтага года.
Нагадаем, што 13 верасня 2011 года сталічныя ўлады ўвялі бясплатны праезд ва ўсіх відах грамадскага транспарту Мінска для студэнтаў і навучэнцаў ПТВ, сярэдніх спецыяльных навучальных устаноў і ВНУ.