Сямашка прапаноўвае рэзка зніжаць стаўку рэфінансавання

Прамысловае лобі хоча танных грошай ізноў.

Першы намеснік прэм’ер-міністра Уладзімір Сямашка 11 мая на пасяджэнні Савета міністраў прапанаваў разгледзець магчымасць рэзкага зніжэння стаўкі рэфінансавання ў другім квартале.

«Прапаную Мінэканомікі, Мінфіну сумесна з Нацбанкам прааналізаваць наяўнасць свабодных рэсурсаў у банкаўскай сістэме і ўнесці прапанову па рэзкім зніжэнні стаўкі рэфінансавання ў другім квартале і да канца 2012 года ў адпаведнасці з узроўнем інфляцыі, гэта значыць не вышэй за 22–25%», — цытуе Сямашку дзяржаўнае агенцтва БелТА.

Да гэтага Мінфіну сумесна з выканкамамі з улікам прафіцытнага выканання бюджэту неабходна прадугледзець дадатковыя рэсурсы рэспубліканскага і мясцовых бюджэтаў для кампенсацыі магчымай часткі працэнтаў па банкаўскіх крэдытах, каб стымуляваць працэс інвестыцый, дадаў Сямашка.

На яго думку, «неабходнасць такіх рашэнняў абгрунтавана тым, што дынаміка дзелавой актыўнасці істотна залежыць ад стану макраэканамічнага асяроддзя». Праблемным зараз з’яўляецца ўзровень ставак па крэдытах для развіцця і пашырэння наяўнай дзейнасці. «Стаўкі па рублёвых крэдытах перавышаюць 45% гадавых і знаходзяцца на недасягальным узроўні для бізнесу, попыт на іх невысокі», — зазначыў першы віцэ-прэм’ер.

Сямашка заявіў, што прадпрыемствы вымушаны закладваць пры распрацоўцы бізнес-планаў інвестыцыйных праектаў у якасці крыніцаў фінансавання замежныя крэдытныя лініі. Праекты ж, якія раней планаваліся пры выкарыстанні крэдытных рэсурсаў беларускіх банкаў, замарожваюцца на няпэўны тэрмін, або пераглядаюцца іх крыніцы фінансавання, у той час як рэсурсы банкаўскай сістэмы дастатковыя.

16 мая ў Беларусі ў чацвёрты раз за гэты год зніжаецца стаўка рэфінансавання — да 34% гадавых.

Каментары да артыкула