Siamaška prapanoŭvaje rezka źnižać staŭku refinansavańnia

Pramysłovaje łobi choča tannych hrošaj iznoŭ.

Pieršy namieśnik prem'jer-ministra Uładzimir Siamaška 11 maja na pasiadžeńni Savieta ministraŭ prapanavaŭ razhledzieć mahčymaść rezkaha źnižeńnia staŭki refinansavańnia ŭ druhim kvartale.

«Prapanuju Minekanomiki, Minfinu sumiesna z Nacbankam praanalizavać najaŭnaść svabodnych resursaŭ u bankaŭskaj sistemie i ŭnieści prapanovu pa rezkim źnižeńni staŭki refinansavańnia ŭ druhim kvartale i da kanca 2012 hoda ŭ adpaviednaści z uzroŭniem inflacyi, heta značyć nie vyšej za 22–25%», — cytuje Siamašku dziaržaŭnaje ahienctva BiełTA.

Da hetaha Minfinu sumiesna z vykankamami z ulikam praficytnaha vykanańnia biudžetu nieabchodna praduhledzieć dadatkovyja resursy respublikanskaha i miascovych biudžetaŭ dla kampiensacyi mahčymaj častki pracentaŭ pa bankaŭskich kredytach, kab stymulavać praces inviestycyj, dadaŭ Siamaška.

Na jaho dumku, «nieabchodnaść takich rašeńniaŭ abhruntavana tym, što dynamika dziełavoj aktyŭnaści istotna zaležyć ad stanu makraekanamičnaha asiarodździa». Prablemnym zaraz źjaŭlajecca ŭzrovień stavak pa kredytach dla raźvićcia i pašyreńnia najaŭnaj dziejnaści. «Staŭki pa rublovych kredytach pieravyšajuć 45% hadavych i znachodziacca na niedasiahalnym uzroŭni dla biźniesu, popyt na ich nievysoki», — zaznačyŭ pieršy vice-premjer.

Siamaška zajaviŭ, što pradpryjemstvy vymušany zakładvać pry raspracoŭcy biźnies-płanaŭ inviestycyjnych prajektaŭ u jakaści krynicaŭ finansavańnia zamiežnyja kredytnyja linii. Prajekty ž, jakija raniej płanavalisia pry vykarystańni kredytnych resursaŭ biełaruskich bankaŭ, zamarožvajucca na niapeŭny termin, abo pierahladajucca ich krynicy finansavańnia, u toj čas jak resursy bankaŭskaj sistemy dastatkovyja.

16 maja ŭ Biełarusi ŭ čaćviorty raz za hety hod źnižajecca staŭka refinansavańnia — da 34% hadavych.

Kamientary da artykuła