У Беларусь прылятае прэзідэнт Башкартастана

Дэлегацыя Рэспублікі Башкартастан Расійскай Федэрацыі на чале з прэзідэнтам Рустэмам Хамітавым 14–15 чэрвеня наведае з візітам Беларусь.

Як паведамляе прэс-служба беларускага знешнепалітычнага ведамства, запланаваныя сустрэчы башкартастанскай дэлегацыі ў Адміністрацыі прэзідэнта і Савеце міністраў Беларусі.

Праграмай візіту прадугледжана наведванне ААТ «Кіруючая кампанія холдынгу «Белкамунмаш», навукова-практычнага цэнтра НАН Беларусі па механізацыі сельскай гаспадаркі, Беларускай гандлёва-прамысловай палаты, а таксама правядзенне кантактна-кааперацыйнай біржы прадстаўнікоў беларускіх і башкартастанскіх дзелавых колаў.

Дэлегацыя наведае таксама Брэсцкую вобласць для азнаямлення з работай сельскагаспадарчых прадпрыемстваў беларускага рэгіёну (КУСП «Саўгас «Брэсцкі», СВК «Чарнаўчыцы», ААТ «Белавежскі»), азнаёміцца з работай і вопытам развіцця турыстычнай сферы ў Дзяржаўнай прыродаахоўнай установе «Нацыянальны парк «Белавежская пушча».

Паводле інфармацыі прэс-службы МЗС, у 2011 годзе тавараабарот з Башкартастанам склаў 1.445,7 млн. долараў і ў параўнанні з 2010 годам павялічыўся ў 2,2 разу, экспарт — 162,0 млн. долараў, павялічыўся на 27,3%, імпарт — 1.283,7 млн. долараў, павялічыўся ў 2,5 разу. Сальда адмоўнае — 1.121,7 млн. долараў.

У студзені-сакавіку 2012 года тавараабарот склаў 417,5 млн. долараў і ў параўнанні з адпаведным перыядам 2011 года павялічыўся ў два разы, экспарт склаў 33,9 млн. долараў і павялічыўся на 11,0%, імпарт склаў 383,6 млн. долараў і павялічыўся ў 2,1 разу. Сальда адмоўнае — 349,7 млн. долараў.

Каментары да артыкула