Незаўважаныя хіты The Rolling Stones

12 ліпеня славутаму гурту спаўняецца 50 гадоў.

12 ліпеня 1962 адбыўся першы канцэрт The Rolling Stones. За мінулыя 50 гадоў «ролінгі» змяніліся хіба знешне. Яны дагэтуль граюць у амаль першапачатковым складзе: толькі гітарыст Браян Джонс памёр яшчэ ў 1969-м, а басіст Біл Уайман у пачатку 90-х сышоў, бо стаміўся.

Што можна дадаць да ўсяго ўжо напісанага пра дасягненні The Rolling Stones. Прапануем відэа пяці вялікіх песняў «роллінгаў», якія рэдка трапляюць у падборкі Greatest Hits. А дарма.

Rocks Off

Гэтая песня адкрывае самы важны ў гісторыі The Rolling Stones альбом — падвойны Exile on Main St. Пра ўмовы запісу альбома на французскай віле Нэлькот ходзяць легенды, здымаюцца фільмы і пішуцца кнігі. А песня Rocks Off, якая спалучыла сапраўдны рок-напор з геніяльным рэфлексійным тэкстам Міка Джагера, узгадваецца рэдка — выпраўляем.

If You Really Want to be my Friend

Адна з самых прыгожых песняў гурту, з альбома It’s Only Rock’n’Roll. З куды больш простай і прыемнай мелодыяй, чым у славутай Angie. Апошняя праца з «ролінгамі» гітарыста Міка Тэйлара, альбомы з якім лічацца «залатым перыядам» гурту.

The Worst

А вось і Кіт Рычард з песняй пра тое, які ён дрэнны, і як ягонай дзяўчыне трэба не звяртаць на яго ўвагі — усё адно ён «горшае, што можа з табой здарыцца».

Fingerprint File

Гэты прыфанкаваны шэдэўр актыўна выконваўся «ролінгамі» у 70-я, аднак з часам ён забыўся. А шкада: пачуўшы яе студыйную версію, і не здагадаешся адразу, што за гурт гучыць з калонак.

Drift Away

Першапачаткова гэты гімн рок-н-ролу мусіў выйсці на адным з альбомаў 70-х гадоў, аднак у выніку цудоўны кавер на Добі Грэя застаўся ляжаць на паліцы. Тым не менш, дзякуючы "бутлегерам", запіс гуляе па свеце вось ужо 20 гадоў.

Каментары да артыкула